"Aq jol" partıasy fraksıasynyń depýtattary "Halyq qaharmany" ataǵy ıegelerine úkimet qaýlysymen mártebe berip, Astana jáne Almaty qalalarynda, oblys ortalyqtarynda halyq qaharmandary aleıasyn ashýdy jáne eldi mekenderdegi áleýmettik obektiler men kóshelerge olardyń esimin berýdi usyndy, dep habarlaıdy "Qamshy" Aqparattyq Agenttigi  Sputnik portalyna silteme jasap.

"Halyq qaharmany atalǵan batyrlarymyzdyń qoǵamda alyp otyrǵan orny men nasıhattalýy, olarǵa kórsetilgen syı-qurmet kóptegen suraq týǵyzýda. Batyrlarymyz janqıar erlikti jeńildik ıa bolmasa ótemaqy alý úshin jasaǵan joq. Tipti aramyzda júrgen az ǵana qaharmandardyń ózderi bul týraly áńgimeni qozǵaǵandy namys kóredi. Batyrlyq pen qarapaıymdylyq qatar júretini belgili", — dedi búgin májilistiń jalpy otyrysynda úkimet basshysyna depýtattyq saýal joldaǵan Berik Dúısenbınov.
Depýtattyń aıtýynsha, olardyń erligin urpaqqa pash etip, laıyqty baǵasyn berý bizdiń eldigimizge syn. Jas urpaqqa ıdeıa bolatyn otan qorǵaý, patrıotızm degen qasıetti uǵymdardy pash etetin osy qaharmandarymyz ekeni anyq. "Mektep túlekteriniń test suraqtaryna bir kúndik shoý bıznes ókilderiniń attarynyń ornyna, soǵysta kózsiz erlik kórsetip, beıbit kúnde eń basty qundylyq adam ómirine arasha túsip, janyn shúberekke túıgen erlerdiń esimi nege turmasqa?! Olar jaıynda oqýlyqtarda múldem aıtylmaıdy deýge bolady. Halyq qaharmany ataǵy tıisti áleýmettik statýspen bekitilmegen. Al kórshi memlekette Reseı batyry ataǵyna ıe bolǵan qandasymyz Serik Sultanǵabıevtiń erligine eń joǵary memlekettik deńgeıde qurmet kórsetilip jatqanyn óz kózimizben kórip otyrmyz. Mysaly, basqa da áleýmettik kómekterden tys, olar 75 myń rúbl aı saıyn járdemaqy alady. Jaraqattaryna qaramastan erliktiń sımvoly retinde ásker qatarynda qaldyrylyp, áskerı bólimge komandır bolyp taǵaıyndaldy", — deıdi Dúısenbınov.
Depýtat atap ótkendeı, Reseıde ondaı batyrlardyń sany 1,5 myńnan astam bolsa da, olarǵa bólinetin qarjyny eshkim búdjetke artyq júk dep sanamaıdy. Al bizdiń beıbit elde soǵys qaharmandarynyń sany saýsaqpen sanarlyq bolsa da, olarǵa memleket kórsetetin shyǵyndardy búdjetke qymbat túsedi dep qorqyp otyrmyz.
"Zańnamada belgilengen halyq qaharmanyna beriletin jeńildikterdiń ishinde jıyrma sharshy metr qosymsha baspana men tegin qabir tasyn ǵana atap ótýge bolady. Osyǵan oraı "Aq jol" fraksıasy kelesi sharalardy júzege asyrý kerek dep sanaıdy. Birinshiden, "Halyq qaharmany" ataǵy ıegelerine úkimet qaýlysymen mártebe berý. Ekinshiden, Astana jáne Almaty qalalarynda, oblys ortalyqtarynda halyq qaharmandary aleıasyn ashý jáne eldi mekenderdegi áleýmettik obektiler men kóshelerge olardyń attaryn berý. Batyrlardyń ómirbaıany, erlik joldaryn jınaq qylyp shyǵaryp, mektep baǵdarlamasyna engizý", — dep túıdi sózin depýtat.