«Laýazymdy kisiler meshitke aıaq kıim sheshpeı kirdi» degen sýret ǵalamtor betin sharlap júrgenine birneshe kún boldy. Sol ýaqyt aralyǵynda biraz shýdyń kóterilgen ras. «Qamshynyń» hat qorjynyna atalmysh máseleniń basyn ashatyn materıal kelip tústi. Oqyrman nazaryna usynamyz.
Sońǵy kúnderi áleýmettik jelilerde «sheneýnikterdiń» meshitte aıaq kıimmen túsken sýreti kópshilik arasynda qyzý talqyǵa túsip, daý týdyryp, arty dinı dúrdarazdyqqa ulasýda. Onyń ústine osy másele jóninde «Kazislam» portalyndaǵy (http://kazislam.kz/ershat-ongarov) sarapshylyq blogyma da birqatar azamattar atalmysh jaǵdaıǵa baılanysty pikir bildirip, máseleniń arajigin ajyratyp berińiz dep ótinýde.
Meshitke eshqandaı «sheneýnik» elimiz táýelsizdik alǵan jyldardan beri aıaqkıimmen kirip aralaǵan emes. Ylaıym budan keıin de solaı bolady. Al, kópshiliktiń talqysyna túsip, daý týdyrǵan sýretke kelsek, ol – meshitke keletin resmı qonaqtarǵa arnalǵan «súıretpe» (tápishke). Shalbardyń balaǵynan shyǵyp turǵan tumsyǵy týflıge uqsaǵan súıretpe kózge syrt aıaq kiıimi bolyp kórinýi múmkin. Alaıda bul súıretpeler meshittiń ishki tártibi men ádebine, meshit dress-kodyna saı taza kıim bolyp sanalady. Osyǵan uqsaǵan súıretpelerdi meshit qyzmetkerleri de kıedi.
Meshit – jer betinde qulshylyq jasaýǵa arnalǵan qasıetti oryn, Allanyń úıi. Sondyqtan, árbir musylman balasy qasıetti orynnyń qurmetin saqtaýy tıis. Meshitke kelýshiniń kiminiń taza ári ádemi bolyýy meshit ádebine jatady. Bul jaıynda Alla Taǵala Quran Kárimde: «Ýa, Adamnyń urpaqtary! Meshitke kelgende ásem kıinińder...», – dep, buıyrǵan (Ál-Aǵraf súresi, 31-aıat). Iaǵnı, meshitke kelgende kıimińiz ásem, ártúrli nájis zattardan taza bolýy tıis. Kıimge qatysty eń basty shart – deneni jalańashtamaı, kıim kıý jáne onyń taza bolýy. Al, daý týdyrǵan súıretpeler meshit ishinde qoldanýǵa ǵana arnalǵan nájisten taza kıim bolyp tabylady.
Qurmetti aǵaıyn, Sizderden ótinerim bir máseleniń baıybyna baryp, aq-qarasyn ajyratyp almaıynsha kóringen kók attynyń (pasyqtardyń) aıtqanyna kóńil bólmeseńizder eken. Mundaı tyrnaq astynan kir izdep, eldi arandatýshy aqparatpen aldap otyrǵandar bar. Olar ózderin dinge janashyr, taqýa etip kórsetkenimen, teris pıǵyly İbilis malǵunǵa qolshoqpar etýi múmkin. Sharıǵat ilimderinde pátýa aıtýǵa bilimi de, quqy da joq kisilerdiń aıtqanymen júrý aqıqatty izdeýge jatpaıdy.
Dál qazirgi ýaqytta ózara qyryq pyshaq bolǵansha, dinı ári azamattyq turǵydan paryz bolyp tabylatyn birlik pen berekeni birinshi kezekke qoıyp, ıslamǵa qatysty kez-kelgen máseleniń jaýabyn tek qana QMDB-dan (múftıattan) ǵana alǵanymyz abzal.
Ershat OŃǴAROV,
«Kazislam» portalynyń menshikti sarapshysy,
ıslamtanýshy
