Oral qalasynda adam shoshyrlyq qylmys oryn alǵan, dep jazady «Qamshy» aqparattyq agenttigi.

KTK arnasynyń habarlaýynsha, Aýyl sharýashylyǵy mınıstrliginiń aýmaqtyq ınspektory men  bólim basshysy araq iship otyryp sózge kelip qalady. Artynsha sheneýnik basshysyn taıaqqa jyǵyp, óltirip qoıǵan. Batys Qazaqstan oblystyq memlekettik ınspeksıanyń bólim bastyǵynyń soqqydan kózjumǵany kórinip tursa da is  «basshynyń ózi óldimen» jabylǵan. Sot saraptamasyndaǵylar sheneýniktiń taıaqtan emes júrek talmasynan qaıtys bolǵanyn aıtady. Buǵan narazylyq tanytqan  marqumnyń týystary máıitke eksgýmasıa jasatyp, onyń kisi qolynan qaza tapqanyn dáleldegen.

-Alǵashqyda is toqtatyldy. Keıin «óz ólimimen óldi» dep múldem jaýyp tastady. Ol qalaı ózi óledi? Túrinen kórinip tur ǵoı, taıaq jegen. Ony Tilek Hımmedenov jaýyzdyqpen uryp óltirgen, – deıdi marqumnyń jary Dına Tólegenova.

Kúdikti Tilek Hımmedenov  – Agroónerkásiptik keshendegi memlekettik ınspeksıa komıtetiniń ıspektory. Marqumnyń týystary dál osy qyzmetkerge kúdik keltirip otyr. Tipti tabandarynan taýsylyp júrip dáleldep te bergen. Ol úshin máıtti qaıta qazyp alyp,  astanalyq dárigerlerge teksertken. Olar marqumnyń júrek talmasynan emes, tunshyǵyp ólgenin anyqtaǵan.      

-Qylmys ornynda túsirilgen sýretter bar. Betin adam tanymastaı etip urǵan. Ony dáledeý úshin eksgýmasıa jasatýǵa májbúr boldyq. Endi ony baılap qoıyp óltirgen degen kúdigimiz bar, – deıdi marqumnyń ápkesi Maısulý Tólegenova.

O basta qatysy joq delingen kúdikti endi «bastyǵym ózime tap berdi» dep sotta aqtalýda. Aıtýynsha, sol kúni ekeýi jumystan birge shyǵyp, biraz aqtan alǵan. Sóıtip arada eregis shyǵyp, sońy bas ınspektordyń ólimimen aıaqtalǵan. Alaıda, marqumnyń murnyn bet qylǵanyna qaramastan, kúdikti «jeńil jaraqat» babymen qutylmaqshy eken. Dese de, buǵan eshqashan jol bermeımiz dep bekingen marqumnyń jaqyndary, sottan kemi 15 jyl úkim kesýdi surap otyr.