Ana bolý – ár qyzdyń mańdaıyna jazylǵan úlken baq. Alaıda, mundaı baqytqa qol jetkize almaı júrgen qanshama qyz-kelinshekterimiz bar. Degenmen, aqshań bolsa, báriniń de sheshimin tabýǵa bolady. Balalar úıinen jetim balany asyrap alady, ne bolmasa qursaq analardy izdeýge kóshedi. Ondaıda ózge otbasyna bala týyp beremin degen analar kezekte turady, tek aqshasyn berseńiz boldy, dep habarlaıdy «Qamshy» aqparattyq agenttigi.

KTK arnasynyń málimetinshe, elimizde aqsha úshin ózgeniń perzentin 9 aı qursaǵynda kóteretin áıelder kóbeıip keledi. Qursaq analar bul qyzmetti 5 mıllıon teńgege deıin baǵalaıtyn bolǵan. Kóbi mundaı áreketke qarjydan qysylǵandyqtan barady eken. Dese de, olardyń bári qursaq ana bolyp, ońaı paıdaǵa kenele almaıdy. Óıtkeni, elimizde bul ádiske zańmen ruqsat etilgenimen, qoıylatyn talap qatań. Al din boıynsha qursaqty jalǵa berýge múldem tyıym salynǵan.

Almatylyq Móldir – 3 balanyń anasy. Alaıda onyń qursaǵynan 5 birdeı shaqalaq shyqqan. Tek byltyr dúnıege kelgen egizderdi ol óz perzenti retinde sanamaıdy. Óıtkeni olardy basqa otbasyǵa sýrrogat ádisimen týyp beripti.

Móldir, qursaq ana:

-Jalǵyz kúıeýim ǵana jumys istedi. Men de jumys istedim. Jalaqy az. Sol úshin de osyndaı jaǵdaıǵa bardym.

EKO ádisimen uryǵy Móldirdiń jatyryna salynǵan erli-zaıyptylar qursaq anany kerek-jaraqtyń bárimen qamtamasyz etken. Jatyryn jalǵa bergen áıel aı saıynǵy tólemnen bólek, 3 mıllıon teńge alypty.

Móldir, qursaq ana:

-Aman-esen sol kisilerdiń balasyn týyp berdim, suraǵanymdy berdi. Sonymen jaqsy qoshtastyq.

Sóıtsek, elimizde qursaq ana bolýǵa qushtar áıelder kóp eken. Ǵalamtorda sondaı habarlandyrýdan kóz súrinedi. Munda qursaq ana bolǵysy keletinder de, ony izdegender de jetkilikti.

«Jasym 24-te. Qursaq ana bolamyn. Maǵan shuǵyl túrde aqsha kerek».

«Meniń qursaq ana bolǵym keledi. Shartym – Astanadan 2 bólmeli páter».

Degenmen, dárigerler óz-ózine jarnama jasaǵandardyń bári qursaq ana bola almaıtynyn aıtady. Elimizde bul ádiske ruqsat etilse de, onyń qatań talaptary bar.

Saltanat Baıqoshqarova, reprodýktolog-embrıolog:

-Jazǵandardyń bári sýrrogatty ana bola almaıdy. Óıtkeni, densaýlyǵy kótermeýi múmkin. Dárigerlerdiń tekserisinen ótkennen keıin belgili bolady.

Buǵan qosa, qursaq ananyń kemi 1 balasy bolýy shart. Kúıeýiniń ruqsaty da asa mańyzdy. Ári múmkindik tek 35-jasqa deıingi áıelderge ǵana beriledi. Biraq endi óz týystaryna qursaq ana bolǵysy keletinderdiń jasyn uzartý máselesi qozǵalyp jatyr.

Záýresh Amanjolova, Májilis depýtaty:

-Jan-jaqty ǵylymı dárejede dáleldeý kerek.  Kelesi joly múmkin 40 dep aıtarmyz. Osylaı aıtý úshin, joǵary deńgeıde dáleldengen medısınalyq tekserýler qajet.

Al dinı turǵyda qursaqty jalǵa berýge múldem tyıym salynǵan.

Baýyrjan Ábdýáli, Qazaqstan musylmandary dinı basqarmasy sharıǵat jáne pátýa bóliminiń mamany:

-SHarıǵatymyzda birinshi tekti saqtaýǵa mán beredi. Qursaq ananyń genetıkalyq sıpattary da keıin sol balaǵa ótip ketedi. Sondyqtan da, bul jerde tektiń aralasýyna saldary, sebepteri bar. Sondyqtan, oǵan sharıǵatymyz tyıym salady.

Tipti bul jaǵdaı daý-damaıǵa ákep soǵýy múmkin deıdi dindarlar. Máselen, qursaq ananyń sábıdi berýden aınyp qalýy, nemese kerisinshe óz ata-anasy odan bas tartýy yqtımal. Degenmen, bizdiń zań boıynsha náreste birden bıologıalyq ata-ananyń tegin alady. Al jylyna osy ádispen elimizdegi bir klınıkanyń ózinde orta eseppen 10 jup perzent súıedi eken.