QR bas prokýrory otbasynda daý týdyrýshylardy óte aýyr jazaǵa tartý kerektigin aıtty. Sonymen qatar jastardy otbasylyq ómirge daıyndap, uldarǵa áke bolýdy erte bastan úıretý qajet, dep habarlaıdy Qamshy aqparattyq agenttigi Informbúro basylymyna silteme jasap.
Bas prokýror Jaqyp Asanov otbasylyq janjaldarǵa qatysty óz pikirin bildirdi.
«Olarǵa eń laıyqty jaza – qoǵamdyq jumysqa tartý. Áıeline zábir kórsetetin erkekterdi aıamaı qoǵamdyq jumysqa salǵan abzal. Alaıda, bizdiń Konstıtýsıalyq zańymyz boıynsha mundaı úkim shyǵarýǵa bolady ma? Bul suraq tóńireginde zańgerler anyq-qanyǵyn anyqtaýy qajet. Ekinshiden, tájirıbede jeti-segiz ret eskertip jatamyz, biraq esh nátıje joq. Sondyqtan da mundaı adamdardy ákimshilik jazaǵa tartý qajet. Alǵashynda 10 kúnge qamasa, ekinshi ret taǵy qaıtalasa, 15 kúnge jaýyp tastaý shart. Eger ol basqasha aıtqandy túsinbeıtin bolsa, qatań jazaǵa tartylýy qajet», - dep málimdedi Jaqyp Asanov.
Sonymen qatar, ákimshilik jazaǵa qatysty birshama ózgertýler engizetinin jáne Qylmystyq kodekste de edáýir tolyqtyrýlar bolatynyn aıtyp ótti.
«Quqyq buzýshylyq pen qylmys kishkentaı balalardyń kózinshe bolsa, bul is óte aýyr jaǵdaı retinde qaralýy tıis. Jańa zańnyń jobasy biz úshin óte mańyzdy, ony İİM birlesip jasaımyz. Túzetýlerdi daıyndap bolǵannan soń depýtattarmen birge engizemiz», - dedi bas prokýror.
Jaqyp Asanov mektepterde kásipkerlik negizderdi úıretetin arnaıy kýrs ashýdy usyndy. Ondaǵy negizgi maqsat – balalardyń qabiletin arttyrý, olardy úlken ómirge daıyndaý jáne táýeldilik psıhologıasyn joıý.
«Jastar bir-birine ǵashyq bolyp, keıinnen úılenedi. Otbasylyq ómirdiń bastapqy kezeńinde bári de jaqsy, keremet ótip jatqanmen, ýaqyt óte kele urys-keris, janjaldar týyndaı bastaıdy. Jastardyń kóbisi otbasylyq ómirdiń mańyzyn túsinbeıdi, ondaǵy shyn baqytty kóre almaıdy. Sondyqtan da, otbasyn qurǵysy kelgen jastar arnaıy kýrstan ótýi qajet. Ol kýrsatn ótpegen jaǵdaıda úılenýge ruqsat berilmeýi tıis. Mundaı erejeler Saýd Arabıasy, Malaızıa, Latvıa syndy álemniń birneshe elderinde qoldanylady», - dep málimdedi qadaǵalaý organynyń basshysy.
Jaqyp Asanovtyń aıtýynsha, kelesi aptada «Qalaı áke bolý qajet?» taqyrybynda ár jerlerde semınarlar ótedi.
Ol Parlamentke ákimshilik jazǵa qatysty ózgertýlerdiń jobasyn usynyp, otbasyndaǵy daý týdyrýshylardy 3 saǵattan bastap 24 saǵatqa deıin túrmege jabý kerektigin aıtty. Janjal týdyrýshy sabasyna túsýi úshin osy ýaqyt jetkilikti.
«Ashýly adamdar yzalanǵan kezinde turǵanda eshkimmen de bitimge kele almaıdy. Mundaı adamdardy emdeı qajet, sebebi bular ózderiniń aýrý ekendigin moıyndamaıdy. Osy syndy jandarǵa arnalǵan psıhokorreksıalyq qyzmet qajet. Kerekti quraldar joq deımiz, alaıda biz jyl saıyn medısınalyq aıyqtyrǵyshtarǵa 5 mıllıardtan kóp qarajat jumsaımyz. Sol aqshaǵa odan da psıhıkalyq aýrýǵa shaldyqqan adamdardy emdeıtin ortalyq ashaıyq», - dep málimdedi Jaqyp Asanov.
Onyń aıtýynsha, Qazaqstanda kúnine 12 áıel zorlyq-zombylyqqa ushyraıdy eken. Árbir úshinshi qylmys otbasynda óltirilgen adamdar bolyp tabylady. 2016 jyly otbasylyq zorlyq-zombylyqtyń saldarynan 36 áıel men bir búldirshin qaza tapqan. Seksýaldy zorlyqtan 2500 áıel men 900 búldirshin japa shekken. Al, óz-ózderine qol jumsaǵandardyń 742-si áıelder bolsa, 175-i kámelet jasqa tolmaǵan jasóspirimder.
Esterińizge sala ketsek, ótken jyldyń qarasha aıynda Bas prokýratýra otbasylyq zorlyq-zombylyqqa qatysty ózgertýler engizetinin habarlaǵan bolatyn.
Aýdarǵan: Nazerke Labıhan
