Búgin Almaty qalasynda Alashordanyń 100 jyldyq mereıtoıyna oraı «100 aǵash egý» aksıasy ótti.

Qamshy agenttigi bastamasymen ótken aksıaǵa qoǵam qaıratkerleri, ádebı qaýym ókilderi, jýrnalıser, stýdentter qatysty.

Aǵash egýge Qamshynyń oqyrmandary kóptep qoldaý bildirip, atymtaı jomarttyq tanytty. Alash rýhyna arnalǵan 100 aǵash Alashshyl belsendilerdiń qyzý atsalysýymen Baıtursynov jáne Jambyl kósheleriniń qılysynda ornalasqan Baıtursynuly saıabaǵyna otyrǵyzyldy. Atalǵan jerde aǵash egýge Almaly aýdanynyń ákimdigi úlken qoldaý jasady.

Bıyl Qazaqstan Respýblıkasynyń irgetasy - «Alashordanyń» qurylǵanyna 100 jyl toldy. Bul tarıhı datany oıdaǵydaı atap ótý - Alash arystary ańsaǵan azat Otanda ómir súrip jatqan bizder úshin abyroıly mindet ekeni daýsyz. Jınalǵandar ótken sharanyń Alash ıdeıasyn, Alash murasyn nasıhattaýda mańyzy zor ekenin atady.

Alash qaıratkerlerin ardaqtaý týrasynda 1 aqpanda Úkimet otyrysynda sol kezdegi Úkimet basshysy orynbasary Imanǵalı Tasmaǵambetov «Alashtyń 100 jyldyǵyna durystap daıyndalýymyz kerek. Alashtyń 100 jyldyǵy sol zamanmen qalyp qoımaı, búgingi táýelsiz memleketpen baılanystyrý oryndy bolady», - degen edi. Oǵan qazaq tildi BAQ-tar men Alashtanýshy, Alash qaıratkerleriniń ómir jolyn zertteýshi ǵalymdar da óz úlesterin qosyp jatyr.

Alash qaıratkerli qurǵan Alash-Orda memleketiniń 100 jyldyq mereıtoıyna oraı BAQ ókili retinde Qamshy aqparattyq agenttigi jyl basynda 5 is-sharany atqarýdy qolǵa alǵan bolatyn.

Ult kósemi Álıhan Bókeıhannyń týǵan kúninde, 5 naýryzda Almatyda Qamshy agenttigi Alash arystaryna arnap as bergen edi.

Aldaǵy ýaqytta Qamshy aqparattyq agenttigi 100 jetim balanyń muqtajdyǵyn qamtamasyz etý, 100 úlgerimi jaqsy muqtaj stýdentke bir jolǵy shákirtaqy berý jáne «Alashtyń 100 izbasary» degen atpen elge eńbek etip júrgen qaıratkerler arasynan 10 adamǵa «Alashorda – 100 jyl» merekelik medalin tabystaý syndy is-sharalardy atqaratyn bolady.