Almatyda qoǵamdyq kólikterde jol júrý úshin saralanǵan tarıf engizilmek. «Kólik týraly» zańǵa ózgeristerdi engizý máselesi Parlament Májilisinde bekitilgen, dep jazady Qamshy AA «Almaty» telearnasyna silteme jasap.

 Qujat senatorlardyń qaraýyna jiberildi.

«Ońaı» kartasy bar azamattarǵa ýaıymdaýdyń qajeti joq, olar úshin jol aqysy sol baıaǵysha 80 teńge bolyp qala bermek. Al qolma-qol aqsha tóleıtinder úshin bılet quny 120 teńgege deıin ósýi múmkin. Sondaı-aq, jańa tarıf bir rettik jol aqysyn tólep, birneshe baǵytqa tegin qatynaıtyndarǵa da qatysty bolmaq. 

«Bizde qazir 2-aq túri bar. Ne siz 80 teńgeden kartochkany alasyz nemese siz pensıoner, oqýshy bolsańyz, jeńildetilgen 1 aılyq tegin qatynaý bıletin alasyz. Eger de siz qoǵamdyq kólikpen jıi júrmeıtin bolsańyz, siz kórsetilgen 10 júris, 50 júris degendeı kartochka alasyz, 1 jyldyń ishinde 10-aq ret júrseńiz, bul kartochka sizge 1 jylǵa jetedi»,- dedi Jolaýshylar kóligi jáne avtomobıl joldary basqarmasynyń basshysy Maqsut Isahov.

Taǵy bir jańalyq - qoǵamdyq kólikke az minetinder birneshe ret jol júrý kartasyna qol jetkize alady. Demek, aıyna 5-6 ret avtobýsqa minetin bolsańyz, soǵan sáıkes karta satyp alasyz. Jolaýshylar mundaı ózgeristerdi jaqsy qabyldady. Olardyń aıtýynsha, bul - qolma-qol aqsha tólep, júrgizýshini mazalaıtyndar qataryn azaıtýǵa yqpaldasady. 

Osylaısha, qala bıligi turǵyndarynyń «Ońaı» kartasyn kóptep qoldanýyna septigin tıgizbek. Demek, bul júıe eki tarapqa da tıimdi – jolaýshylar qosymsha 40 teńge tólemeıdi, al tasymaldaýshylar kóleńkeli tabystaryn jasyra almaıdy. Jańa tarıftiń naqty qashan engiziletini ázirge belgisiz. Qujat tolyq maquldanǵannan keıin, ózgertýler men tolyqtyrýlardy jergilikti máslıhat bekitetin bolady.