Ózbekstannyń Namanǵan oblysy Chodak aýylyndaǵy meshittiń ımamy Ahmadjon Eshmatov sotqa tartyldy, dep habarlaıdy Qamshy AA Ortalyq Azıa jańalyqtar qyzmetine silteme jasaı otyryp.

44 jastaǵy ımam Ózbekstannyń kásipodaq federasıasyna qaraıtyn «Chatkal» demalys ornynda sharıǵat zańymen ýaǵyz oqyǵan.

Biraq resmı ruqsatsyz dinı ýaǵyz aıtýmen aınalysqan ımam ákimshilik zańmen aıyptalǵan. Sot sheshimimen Ahmadjon Eshmatovqa on aılyq eseptik kórsetkish boıynsha aıyppul tóleýdi mindettegen.

Jergilikti BAQ-tyń málimeti boıynsha, Ózbekstannyń Ulttyq qaýipsizdik qyzmeti ımamǵa «ýaǵyz aıtý isin jalǵastyratyn bolsań, qylmystyq jazaǵa tartylasyń» dep eskertken.

Ózbekstan musylmandary dinı basqarmasynyń arnaıy ruqsatynsyz ózbek ımamdaryna ýaǵyz aıtýǵa tyıym salynǵan.