Venesýela prezıdenti Nıkolas Madýroǵa qarsy narazylyq ereýili barysynda eki stýdent pen Ulttyq gvardıa serjanty qaza tapty. Bul týraly Qamshy AA   Reuters-ke silteme jasap habarlaıdy.

Opozısıa ókilderi Madýronyń saıasatyna qarsy narazylyqqa shyqty. Olardyń pikirinshe prezıdent eldegi demokratıany shektep, ekonomıkaǵa zıanyn keltirýde.

Birneshe myń adam qatysqan narazylyq sherýi 2014 jyldan bergi bolyp ótken ereýilderdiń ishindegi eń uzaqqa sozylǵany eken. 19-sáýirde bolyp ótken sherýde 400-ge tarta adam polıseı qyzmetkerlerimen ustaldy.

Al Venesýela prezıdenti Madýronyń aıtýynsha, bul ereýildiń maqsaty- elde tóńkeris jasap, sosıalızmdi joıý. Úkimetke opozısıa bolyp otyrǵan halyqtyń aıtýynsha, prezıdent dıktator bolyp ketken, azamattar sanasyna  qorqynysh pen zorlyq uıalatý úshin áskerı kúshti qoldanady deıdi.

Bıylǵy jylda oryn alǵan ereýilderde barlyǵy segiz adam qaza tapty. Opozısıa lıderi Enrıke Kaprıles halyqty 20  sáýirde de ereýilge shyǵýǵa shaqyrdy.