Eldegi sý tasqyny qaýpi bar óńirlerde apattyq-qutqarý jáne aldyn alý sharalary táýlik boıy júrgizilip keledi. Bul týraly QR İİM Tótenshe jaǵdaılar komıtetiniń resmı ókili Rýslan Imanqulov.
«Júrgizilgen sharalar aıasynda 872 turǵyn úı men saıajaılardan tasqyn sý sorǵytyldy jáne aıdaldy. Respýblıka boıynsha Aqmola, Aqtóbe, Qaraǵandy, Qostanaı jáne Shyǵys Qazaqstan oblystarynyń eldi mekenderinde 514 turǵyn úı, 850 saıajaı jáne 7 ǵımaratty áli de sý basyp jatyr.
Qyzyl sý kelgen óńirlerde adamdar men aýyl sharýashylyq janýarlaryn evakýasıalaý, sýdy sorǵytý jáne aıdaý, sý qoımalaryn muzdan tazartý, ınertti materıaldar ákelý, qapshyqtar ázirleý, bógetterdi nyǵaıtý, sý deńgeıin baqylaý, qoǵamdyq tártipti saqtaý jumystary júrgizilýde», - dep atap ótti Rýslan Imanqulov.
Sý tasqyny kezeńi bastalǵaly 71 adam qutqarylyp, 8126 adam aldyn ala evakýasıalandy. Onyń 3 029-y óz úılerine oralsa, 901-i evakýasıa oryndaryna, 4169 turǵyn týystaryna ornalastyryldy.
Áleýmettik jelilerde sý tasqyny jaǵdaıy boıynsha jalǵan aqparat taratý faktileri jıilep ketkendigine baılanysty qutqarýshylar Ákimdik pen TJD resmı kózderi taratqan aqparatty ǵana nazarǵa alýdy suraıdy jáne kórineý jalǵan aqparat taratqany úshin Qazaqstan Respýblıkasy Qylmystyq Kodeksiniń 274-shi babyna sáıkes ákimshilik nemese qylmystyq jaýaptylyq kózdelgenin eskertedi.
