Aldaǵy ýaqytta elimizdiń óz chaty, ıaǵnı hat nemese basqa da aqparattyq materıaldardy almasýǵa múmkindik beretin mobıldi komýnıkasıalyq júıesi bolady, dep habarlaıdy Qamshy aqparattyq agenttigi.
Búgin Almaty qalasyndaǵy Aıser qonaq úıinde osy júıeniń jasaýshy avtory Dáýren Qazybekulynyń jáne ózge de IT mamandarynyń qatysýymen konferensıa bolyp ótti. Konferensıa barysynda baǵdarlama qyzmeti egjeı-tegjeıli tanystyryldy.
Bul júıe Indigo24 dep atalady. Indigo24 qazirgi qoldanystaǵy Whatsapp, Wechat, Viber syndy tanymal jelilerdiń otandyq túri bolmaq jáne onyń erekshelikterimen qoldaný fýnksıasynyń ámbebaptyǵy, sonymen qatar tıimdilikteri óte kóp. Eń negizgi ereksheligine toqtalar bolsaq, habarlamany ýaqyt belgileý arqyly jiberýge, ıaǵnı erteńgi ýaqytty josparlaý arqyly aldyn-ala jiberýge bolady. Vıdeokonferensıalar, tikeleı efırde baılanysqa shyǵý syndy tetikteri iske qosylǵan. Sonymen qatar aqsha aýdarymdaryn júzege asyrýda bankomat kartochkalaryna, jeke esep-shotqa júıe ishinde aýdarymdar jasaýǵa, komýnaldyq tólemder men satyp alý tólemderin jasaý kezinde, kınoteatr jáne ózge de jol júrý bıletterine tapsyrys berýde keńinen paıdalanýǵa bolady. Bir qyzyqtyratyny like basý aqyly, ıaǵnı bir teńge bolsa, sizge basylǵan lúpilden esep-shotyńyzǵa sol aqsha túsedi. Bul arqyly qaıyrymdylyq sharalarymen qatar basqa da paıdaly isterdi júzege asyrýǵa bolady. Wechat, Whatsapp tárizdi jelilerdiń búkil fýnksıasy Indigo24 júıesinde qamtylǵan. Bolashaqta búkil álemdik qoldanysqa shyǵarý josparlanǵan. Negizgi shet tilderiniń barlyǵy engizilip, atalǵan qyzmetterdiń barlyǵyn oryndaýǵa ázir alǵashqy otandyq baǵdarlama bolyp tabylady. «Qazir elimizde jan jaqty jarnamalaý jumystary júrip jatyr, tipti shet eldik kompanıalar osy júıemen birigip jumys jasaýǵa qyzyǵýshylyq tanytýda», - deıdi ıdeıa avtory kásipker Dáýren Qazybekuly.
Jýrnalısterdiń qatysýymen ótken konferensıa kelgen qonaqtardyń barlyq suraqtaryn qanaǵattandyryp qoımaı, qatty qyzyǵýshylyǵyn týdyrdy. Ózimizdiń Whatsapp-ymyz bolatyny kez-kelgen Qazaqstandyq úshin qýanarlyq jańalyq ekeni sózsiz. Al, iske sát!
