Qazaqstanda jaqyn arada musylmannyń ortaq kıim úlgisi paıda bolady. Qyz-kelinshekterdi dástúrden ozbaı, dinniń talaptaryna saı kıinýin dinı basqarma óz moınyna aldy, dep jazady Qamshy aqparattyq agenttigi.
Qazaqy kıimniń basty mindeti qyzdarymyzdy qara jamylǵydan aryltyp, aq jaýlyq, keń etek kóılekti qaıtarý. Qaýǵa saqal, qysqa balaqpen de kúres kúsheıedi. Budan bylaı kimder jáne qandaı túr-surpat zańǵa kelte kelýi múmin?
KTK jańalyqtar qyzmetiniń habarlaýynsha, resmı Aqorda saıasat, ekonomıkadan qoly bosap, eldiń ıdeologıasyna myqtap kirisken syndy. Endi prezıdent, aıta-aıta ábden jaýyr bolǵan qaýǵa saqal men qara jamylǵy daýyna sońǵy núkte qoıýǵa pármen berdi. Tipti bolmaı jatsa, zańmen tyıýdy qarastyryńdar dep qatań aıtty. Nazarbaevtan kúni keshe tapsyrma alǵan dinge jaýapty mınıstrlik iske kirisip te ketti.
«Sapsıǵan saqal, qysqa balaq arqyly musylmannyń sıpaty nasıhattalǵanda - bul qoǵamdy úreılendiredi. Musylmandyq týraly qalyptasqan qundylyqtar joıylady. Bul jerde sózsiz ulttyq qaýipsizdikke nusan keledi. Sondyqtan bul úrdisti toqtatar naqty sharalar qabyldanýy kerek», dedi QR Din isteri komıteti tóraǵasynyń mindetin atqarýshy Baqytjan Qulekeev óz sózinde.
Sharanyń biri musylmannyń syrt kelbeti. Endi qap-qara bop alabóten bolǵan qyzdardyń kıimi endi ashyq tústi oramal, kóılekpen almastyrylmaq. Eń birinshi medrese shákirtterine tigiletin musylmandyq kıim úlgilerin qoǵam quptasa, kópshilikke usynylady.
Aǵabek Qonarbaıuly, Qazaqstan Musylmandary dinı basqarmasynyń ókili:
«Dál qazirgi ýaqytta medresede oqyp jatqan qyzdarymyzǵa, shákirtterimizge ashyq tústi, kók tústi kıim úlgilerin daıyndap jatyrmyz. Ol kıim úlgileri sharıǵatqa da saı, dástúrimizge de saı, jalpy qoǵam aldynda oǵash kórinbeıtin kıim úlgisin daıyndap jatyrmyz».
Musylman kıimin bútindeýden bólek, moldalar aldynda turǵan odan zor mindet bar. Jamaǵatty uıyta almaıtyn, sózi ótimsiz ımamdardy memleket basshysy synady. Budan bylaı sharıǵattan asa almaıtyn, syńarjaq dúmshe molda din isinen shettetilýi múmkin.
Dosaı Kenjetaı, dintanýshy:
«Tyıym degen másele syrtqy kórinistegi máselelerdi sen zorlyqpen alyp tastaýyń múmkin. Zorlyqpen saqalyn qyryp alyp tastaýyń múmkin. Biraq ishki jan dúnıesi, rýhy, dili, senim máselesine biz eshqashan tyıym sala almaımyz. Olardyń bári shablondar, qundylyqtar. Syrttan kelip jatqan biz úshin qunsyz qundylyqtar».
Dintanýshy qunsyz qundylyqtan arylmaq kerek deıdi. Al qaı qundylyqtyń bizge bóten ekenin prezıdent ózi tarqatyp bergen bolatyn.
Nursultan Nazarbaev, Qazaqstan Respýblıkasynyń prezıdenti:
«Sońǵy kezde órimdeı jas jigitter saqalyn sapsıtyp qoıyp, balaqtaryn short kesip keledi. Betin tumshalap, búrkep, qap-qara kóılek kıgen qyzdardyń qatary kóbeıdi. Árıne árkimniń ne kıemin dese, óz erki, bostandyǵy degen sóz ǵoı. Ol basqa nárse. Mynaý ádeıilep turyp, bizge qarsy shyǵatyn qazaqty bóletin. Qudaı degen adamnyń júreginde bolýy kerek emes pe?».
Prezıdentten pármen alǵan Din isteri mınıstrligi múftıatpen birigip dereý iske kiristi. Meshitter jamaǵattyń júregindegi Qudaı týraly túsinikti túzese, mınıstrlik musylmannyń syrt-pishinin, kerek bolsa jyl sońyna deıin bekitemiz dep bekinip otyr.
