Nursultan Nazarbaev Beıbitshilik jáne kelisim saraıynda Dımash Qudaıbergenmen kezdesti dep habarlaıdy Qamshy aqparattyq agenttigi.
QR Prezıdenti Nursultan Nazarbaev Dımash Qudaıbergenge aq batasyn berdi. Álemdik sahnada óner kórsetip, qazaq elin dúnıejúzine tanytyp júrgen Dımashty eń aldymen eńbeginiń, odan keıin Qudaı bergen talantynyń arqasynda zor jetistikterge jetkenin tilge tıek etip, daýsyn saqtaýǵa keńes berdi.
"Seniń boıyńda aıryqsha daryn bar. Sony saqtaı bil. Men seniń bolashaǵyńnyń jarqyn bolýyn tileımin. Halqyńa qyzmet etý jolynda qýatyń sarqylmaǵaı. Seni qazir barlyq jerge shaqyryp jatyr. Sol úshin saǵan myqty densaýlyq kerek" dep batasyn berdi Elbasy.
Dımash álemniń qaı túkpirine barsaq ta Qazaqstannanbyz dep basymyzdy tik kóterip, óresi bıik el ekenimiz kórsete otyryp, maqtanyshpen baıqaýǵa baratynyn aıtyp, táýelsizdik pen beıbit ómir úshin Memleket basshysyna alǵys bildirdi. Ánshi armany týraly da aıtyp ótti.
"Men úshin Sizden bata alý úlken baqyt. Úlken arenada jeke konsertimdi berý meniń armanym. Sol armanymnyń oryndalýyna demeý bildirip jatqanyńyzǵa rahmet aıtamyn" dedi Dımash.