Saǵyntaev sheneýnikterdi aǵylshynsha saıratpaqshy

    Zhazira Baidaly
    Saǵyntaev sheneýnikterdi aǵylshynsha saıratpaqshy

    QR Premer-Mınıstri Baqytjan Saǵyntaev Qazaqstanǵa tartylǵan ınvestorlardyń aımaqtarda birqatar kedergilerge tap bolatynyna alańdap otyr. Sonyń biri - jergilikti bıliktiń til bilmeýi,  dep xabarlaıdy Qamshy aqparattyq agenttigi QazAqparatqa silteme jasaı otyryp.

     "Qazirgi kezde biz ulttyq ınvestısıalyq strategıany ázirlep jatyrmyz. Ol da Prezıdenttiń tapsyrmasy. Osy jumysqa xalyqaralyq sarapshylar tartylyp otyr. Sondaı-aq, biz ózimizdiń aımaqtaǵy áriptesterimizge osy máseleniń mańyzdylyǵyn túsindirdik. Sebebi dál sol aımaqtarda kóptegen máseleler týyndaıdy. Endi, biz, Úkimette otyrǵandar, ınvestısıalyq saıasatty ózgertýdiń qajettiligin jaqsy túsinemiz. Sol sebepti osy saladaǵy jumystyń aımaqtarda turalap qalǵanyn qalamaımyz. Sondyqtan oblys ákimderiniń ınvestısıalar jónindegi orynbasarlarymen qosymsha keńester ótkizdik. Biz keıbir basshylardyń osy salada jumys isteýge áli de daıyn emes ekenin baıqadyq. Tildi tıisti deńgeıde bilmeıtinderi de kóp nárseni ańǵartady. Iá, olardyń basqa da jumystary da jetip artylady. Ony da bilemiz. Osyǵan baılanysty biz Prezıdent Ákimshiligine tıisti xatty ázirlep jatyrmyz. Investısıalardy tartý jumysyn retke keltirý kerek", - dedi Saǵyntaev búgin Qazaqstannyń ınvestısıalyq áleýetin tanystyrýǵa arnalǵan sharada.

    Atalǵan sharada QR Investısıalar jáne damý mınıstri Jeńis Qasymbek pen "Kazakh Invest" ulttyq kompanıasynyń basshylyǵy shet memleketterdiń elshilerine ınvestısıalardy tartý, shetel ınvestorlaryna yńǵaıly jaǵdaı jasaý salasyndaǵy jumystar jaıynda baıandap berdi. Premer-Mınıstrdiń aıtýynsha, búginde shetel ınvestısıalaryn tartýdyń burynǵy júıesi tolyǵymen ózgertildi. Osy salada arnaıy "Kazakh Invest" ulttyq kompanıasy quryldy. Al kompanıanyń dırektorlar keńesi Úkimet basshysy dárejesine deıin kóterildi. "Keńestiń tóraǵasy men bolamyn. Biz dırektorlar keńesiniń mártebesin ádeıi kóterdik. Sonyń ózi ınvestısıalyq saıasattyń basymdyǵyn, Qazaqstan úshin qanshalyqty mańyzdy ekenin kórsetse kerek", - dep atap kórsetti Saǵyntaev.


     

    Qatysty Maqalalar