Atyraý oblysy ákimdigi ǵımaratyna kásibı qyzmetin atqarýǵa barǵan jýrnalısi krosovka kıgeni úshin kirgizbeı qoıǵan, dep habarlaıdy Qamshy aqparattyq agenttigi azattyq.org-ke silteme jasap.
Máseleniń jaı-japsaryna úńilgenderge ákimdiktiń kıim týraly buıryǵy bar ekeni aıtyldy. Al jýrnalıser quqyǵyn qorǵaıtyn «Ádil sóz» uıymy ókili «Bul - tilshiniń kásibı qyzmetine bóget jasaý» deıdi.
«KÚISİZ ADAM DA İSKERLİK KIİMMEN KELÝİ KEREK PE?»
Oqıǵa sáýirdiń 21-i kúni bolǵan. Jergilikti "Aq Jaıyq" gazetiniń tilshisi Zúlfıa Baınekeeva redaksıa tapsyrmasymen sol kúni bolatyn oblystyq maslıhattyń sesıasyna qatysý úshin Atyraý oblysy ákimdigi ǵımaratyna barǵanda, ony kúzetshilerdiń kirgizbeı qoıǵan.
- Ústimde qara bylǵary kúrte, aıaǵymda qara krosovka boldy. Bul - meniń kóktemgi kıimim, - deıdi ol.
Jýrnalısiń sózine qaraǵanda, oqıǵa kezinde ákimdiktiń baspasóz qyzmetiniń ókili Salamat Sabyrdyń «kirgizińder» degen sózine kúzetshiler qulaq aspaǵan. Zúlfıa Baınekeevanyń aıtýynsha, «Kúzetshiler oǵan ákim apparaty jetekshisiniń qoly qoıylǵan ishki buıryqtaryn kórsetken. Onda syrttan kelgen adam iskerlik kıimmen kelýi mindettelgeni jazylǵan. Buıryqqa 2016 jyly sáýir aıynda qol qoıylǵan. Biraq bul buıryq olardyń esine aıaqastynan juma kúni túsken».
Dál sol kıimmen bir apta buryn sol ákimdikke kirip shyqqan edim, - deıdi jýrnalıs.
Atyraý oblysy ákimdiginiń baspasóz qyzmeti ókili Salamat Sabyr óziniń bul oqıǵaǵa kýá bolǵanyn joqqa shyǵarmady.
- Ákimdikke jınalysqa shaqyrylǵan ár adam iskerlik úlgide kıinip kelýi kerek. Bul týraly qaýly ákimdiktiń kireberisinde ilýli tur, - degen Salamat Sabyr Zúlfıa Baınekeevanyń «oblystyq máslıhat sesıasyna shaqyrylǵandar tiziminde bolmaǵanyn» aıtady.
- Shaqyrtýdy máslıhattyń ózi jasaıdy. Ol shaqyrylmaǵan. Biraq men áriptes retinde kómektesýge bardym. Sóıtsem, ol krosovkamen tur. Kúzetshilerden kirgizýin suradym, olar kirgize almaıtyndaryn aıtty, - deıdi ol.
Al Zúlfıa Baınekeeva «Sonda bul jerge qart zeınetkerler de, múgedekter men úısiz-kúısiz júrgender de keledi. Olardyń barlyǵy iskerlik kıimmen kelýi kerek pe?» dep narazy.
«DRESS-KOD SYRTTAN KELETİNDERGE MİNDETTİ EMES»
Azattyq tilshisi ákimdikke syrttan kiretin adamdardyń ári jýrnalıserdiń kıim úlgisine talap qoıý máselesiniń basqa memlekettik mekemelerde qalaı retteletinin zerttep kórmek úshin Almaty oblysy ákimdigi baspasóz qyzmetiniń bas mamany Qýanysh Ojarovqa habarlasqan bolatyn. Onyń sózinshe, «Dress-kod (resmı kıim úlgisi – red.) tek memlekettik mekeme qyzmetkerlerine ǵana mindetti».
- Memlekettik qyzmetkerlerge ózimizdiń ádep kodeksimiz boıynsha kıimniń iskerlik úlgisimen júrý mindettelgen. Al jınalysqa nemese qandaıda bir jıynǵa syrttan shaqyrylǵan qonaq dress-kodqa saı kıinip kelsin degen talap joq,- deıdi.
Qýanysh Ojarov óziniń beıresmı jeke pikirin «syrt adamdardyń memlekettik mekemege iskerlik úlgide kıinip kelgeni durys» dep bildirdi.
Ádilet mınıstrliginiń resmı ókili Oljas Ramazanov «memlekettik qyzmetkerlerdiń dress-kodyn, ıaǵnı olar qalaı kıiný kerek, shashtaryn qalaı qoıý kerek deıtin saýalǵa «memlekettik qyzmet isteri jáne sybaılas jemqorlyqqa qarsy is-qımyl agenttigi» jaýap berýge tıis ekenin aıtady. Biraq atalǵan mekemeniń Atyraý oblystyq departamentiniń ókili Málik Qarıev «resmı túrde hat jazý kerek ekenin, telefon arqyly jaýap bere almaıtynyn» málimdedi.
«BUL – JÝRNALISKE JASALǴAN KEDERGİ»
Jýrnalıser quqyǵyn qorǵaıtyn «Ádil sóz» uıymynyń ókili Ǵalıa Ájenova Atyraý oblysy ákimdiginde bolǵan oqıǵany «bul - jýrnalısiń kásibı qyzmetine kedergi jasaý» dep túsindiredi.
- Bul jerde qıturqylyq saıasat bolǵanyn kórýge bolady. Sıtýasıaǵa qarap otyrsaq, oblystyq ákimdik bolsyn, qalalyq ákimdik bolsyn, ony basqaratyn ákim emes, kúzetshi sıaqty. Iaǵnı, memlekettik organdarda [bul máseleniń] núktesin qoıatyn qojaıyn joq, - deıdi.
Ǵalıa Ájenovanyń sózinshe, «dress-kod máselesi tek sol mekemedegi (ákimdikti aıtady – red.) qyzmetkerlerge mindetti. Al, ákimdikke «mynandaı kıimmen kelýge bolady, anandaı kıimmen kelýge bolmaıdy» degen ereje joq».
- Krosovka - resmı jerge kıetin aıaqkıimderdiń biri. Sol sebepten bulardyń (ákimdik ókilderin aıtady – red.) ýáji qısynsyz, - deıdi «Ádil sóz» uıymynyń ókili.
Qazaqstan prezıdentiniń 2015 jyly jeltoqsannyń 29-y kúni shyǵarǵan «Qazaqstan memlekettik qyzmetshileriniń ádeptilik normalaryn jáne minez-qulyq qaǵıdalaryn odan ári jetildirý jónindegi sharalar týraly» № 153 jarlyǵymen memlekettik qyzmetshilerdiń ádep kodeksi (qyzmettik ádep qaǵıdalary) bekitilgen. Onda «memlekettik qyzmetshilerdiń syrt kelbeti olardyń qyzmettik mindetterin oryndaý kezinde memlekettik apparattyń bedelin nyǵaıtýǵa yqpal etýge, iskerlikpen, ustamdylyqpen jáne uqyptylyqpen erekshelenetin jalpy qabyldanǵan iskerlik talaptaryna saı bolýǵa tıis» dep jazylǵan.
Qazaqstan konstıtýsıasynda sóz bostandyǵyna, aqparattardy zańda tyıym salynbaǵan kez kelgen ádispen alýǵa jáne taratýǵa kepildik beriletini; BAQ týraly zańda jýrnalıserdiń aqparatty izdestirýge, suratýǵa, alýǵa jáne taratýǵa; memlekettik organdarǵa, túrli menshik nysandaryndaǵy uıymdarǵa barýyna jáne qyzmet babyndaǵy mindetterin júzege asyrýǵa baılanysty sharalarǵa qatysýǵa quqyly ekeni jazylǵan.
