Masaget qazaq jastar portaly bir aı buryn «AINA» jańa jobasyn qolǵa aldy. Maqsaty – óner-ǵylym áleminde júrgen tulǵalar jóninde qunsyz aqparatqa qunyǵatyn oqyrmannyń talǵamyn joǵarylatý.
Búgingi shyǵarylym 24 jasynda «Qazaq KSR Eńbek sińirgen óner qaıratkeri» qurmetti ataǵyna ıe bolǵan, Qazaq KSR-nyń Halyq artısi, Ónertaný ǵylymynyń profesory, «Parasat» Ordeniniń ıegeri, M.Áýezov atyndaǵy Qazaq memlekettik akademıalyq drama teatry dırektorynyń keńesshisi Esmuhan Obaevtyń ishki álemine úńilýge arnalady.
Balalyq shaq degende Esmuhan Obaev eriksiz kúrsinedi. Azappen, ashtyqpen, joqtyqpen ótken kezeń Obaevtyń zamandastary úshin aýyr boldy.
«Aýylda terezeden qarap turyp: «Shirkin-aı, etigi bar adamdardyń ómiri qandaı rahat! Mektepke aıaqtary aýyrmaı baratyn...» dep oılaıtynbyz. Zamannyń sol kezdegi áseri, adamnyń ýaqytpen kúresýi, zamandy adamnyń tárbıeleýi, osyndaı kezeńderden ótkenbiz» deıdi óner qaıratkeri.
Sondaı-aq, taýǵa qaraýdy jaqsy kóretinin aıtty.
«Taýǵa qarasam, jastyq shaǵymdy, áke-sheshemdi, jaqsy ýaqyttar men ókinishterdi oılaımyn. Taýdyń aldynda esep berip turǵan durys, sebebi taý eshnárseni jasyrmaıdy, taý adamdy silkintedi, taý adamdy kóteredi, taý kórgen saıyn rahat sezimge bólenemin».
Parasatty óner ıesi alǵash óner jolyna qalaı kelgenin de aıtty. Qazaqtyń tuńǵysh kásibı rejıseri, Qazaq KSR-niń Halyq ártisi Asqar Toqpanov Esmuhan Obaevty ónerge ákelgen edi. Sol kisimen kezdesý – ártistiń óner jolynyń kilti boly tabylady.
Ataq jaıly da sóz qozǵady. Onyń oıynsha, ataq adamdy buzbaıdy, ataq densaýlyq bermeıdi, asyp turǵan mártebe bermeıdi. Alǵash ataq qazaq teatrynda istep júrgende oılamaǵan jerden berilgen eken, «Qazaqstannyń eńbek sińirgen qoǵam qaıratkeri» ataǵyn ıemdendi.
Halyq ártisiniń «uly» degen sóz týrasynda oıy: «Men kórgen ulylar paıǵambar tıptes kórinetin. Taza, meıirimdi, minsiz, qarapaıym, kishipeıil, bilgir, túzý adamdar edi. Shyndyqqa, eńbekqorlyqqa, týralyqqa úıretti.
Esmuhan Obaev úshin baqyt kilti – tiri júrýde. «Qýanǵan adamdy kórý – baqyt, jylaǵan adamdy jubatý – baqyt, aýyrǵan adamnyń kóńilin suraý – baqyt» dep oıymen bólisti.
