AQSH memlekettik hatshysy Reks Tılerson men Qazaqstannyń syrtqy ister mınıstri Qaırat Ábdirahmanov Nú-Iorkte kezdesip, áriptestik máseleleri men Sırıa jáne Aýǵanstandaǵy jaǵdaıdy talqylady. Júzdesýde Koreı túbegindegi janjal da sóz boldy.
Halyqaralyq arenadaǵy jaǵdaı Qaırat Ábdirahmanovtyń BUU Bas hatshysy Antonıý Gýterrıshpen kezdesýinde de talqylandy. Qazaqstan ókilderi 28 sáýirde BUU Qaýipsizdik keńesiniń mınıstrler debatyna qatysty. AQSH tóraǵalyǵymen ótken debatta Soltústik Koreıa jónindegi másele talqylandy.
Halyqaralyq qaýymdastyq Koreı túbegindegi áskerı janjaldyń órshýinen qaýiptenedi. Sońǵy birneshe aptada Soltústik Koreıa ıadrolyq arsenalyn kúsheıtkenin kúnde málimdep júr. Phenán jappaı qyryp joıatyn qarýdyń jańa synaqtary ótetinin, aımaqtaǵy amerıkalyq kúshterge soqqy jasaıtynyn aıtty.
AQSH teńiz kúshteri men atom súńgýir qaıyǵyn Koreı túbeginiń jaǵalaýyna jetkizdi. Vashıngton jyl sońyna deıin Ońtústik Koreıada Zymyranǵa qarsy qorǵanys júıesin ornatýdy kózdep otyr. Aq úı BUU-ny Soltústik Koreıaǵa qarsy sanksıalardy kúsheıtýge shaqyrdy.
Pikir qaldyrý