AQSH-tyń burynǵy prezıdenti Bıll Klınton buǵan deıin bestesellerge aınalǵan birneshe kitaptyń avtory, tanymal jazýshy Djeıms Pattersonmen birge The President Is Missing atty saıası roman jazyp jatyr. Klınton men Pattersonnyń birlesken shyǵarmasy 2018 jyly maýsymda jaryq kórmek. Bul jóninde Azattyq jazady.

«Prezıdent Klıntonmen birge seriktes bolý – kareramnyń eń shyrqaý shyńy... Men áńgime aıtýshymyn, al prezıdent Klıntonnyń qosqan úlesi bizge shyn máninde qyzyqty tarıhty baıandaýǵa múmkindik berdi» degen Patterson.

Kitapty basyp shyǵarý quqyǵyna ıe bolǵan eki baspa úıiniń málimdeýinshe, bul «bıliktiń eń joǵarǵy satysyndaǵy, egjeı-tegjeıi tek prezıdentterge ǵana málim saıası shıelenis pen astyrtyn tartys jaıyn baıandaıtyn shyǵarma» bolmaq.

«Prezıdent qyzmeti men Aq úıdegi ómir jaıly, Vashıngtonda qyzmettiń qalaı atqarylatyny týraly bilimime negizdelgen kitap jazý – úlken ǵanıbet» deıdi AQSH prezıdenti bolyp eki márte saılanǵan Bıll Klınton.

Sholýshy: Gúlim Jaqan