MEMLEKETTİK MEKEMELERGE ÚLGİ BOLARLYQ AIAQ KIİM DÚKENİ - «SMAN»
Táýelsizdik alǵaly beri óz mádenıetimiz ben tilimizdi aldyńǵy qatarǵa qoıyp, ózimiz bı ózimiz qoja bola almaı júrgenimiz bárine aıqyn. Jeke saýda oryndary túgili memlekettik qyzmet kórsetý oryndarynyń ózinde de ana tilimiz óz deńgeıinde qasterlenbeı keledi. Táýelsizdigimizge shırek ǵasyr ýaqyt ótse de quldyq sanadan aryla almaýdamyz.
Eger Almaty qalasynda memlekettik organdardy esepke almaǵanda, saýda oryndarynan memlekettik tilde joǵary deńgeıde qyzmet kórsete alatyn jalǵyz dúken bar desek , biz qaıǵyramyz ba? Álde tańǵalyp, oǵan qýanamyz ba? Árıne, tilimizdiń kende qalyp otyrǵanyn osydan-aq baıqaýǵa bolady.
«SMAN»
Bul Almatydaǵy «Mega, Dostyk Plaza» syndy oıyn-saýyq jáne saýda ortalyqtarynda ornalasqan aıaq-kıim dúkeni.
Aıtaıyn dep otyrǵanym aıaq kıim jaıynda emes, olardyń qyzmet kórsetý erekshelikteri jaıynda.
Ózim bul dúkende birneshe ret boldym. Kez-kelgen adamnyń tańdanysyn týǵyzatyn jaıt - dúkenniń qyzmetkerleri.
Ár joly barǵanyńda olardyń qazaq tilinde, tamasha yrǵaqpen satyp alýshylardy ózderine baýrap alatyndyqtary kóńilimdi bir marqaıtyp tastaıtyn.
Jýrnalıs retinde osyny bir jazsam, ózgelerge úlgi bolsa degen nıet kóp ýaqyttan beri oıymda júrdi.
Mine, sáti túsip, suhbat alýǵa baryp qaıttym.
Jalpy ujymnyń aıtýy boıynsha, bul dúken osydan 3 jyl buryn óz jumysyn bastaǵan eken.
Dúkenniń «Mega centre» oıyn saýyq ortalyǵyndaǵy Bekarys Abaıuly esimdi qyzmetkerimen suhbattastyq.
Sizderdiń memlekettik tilge basa nazar aýdarýlaryńyzǵa ne sebep?
Memlekettik til qazaq tili bolǵandyqtan biz ony birinshi orynǵa qoıamyz. Sebebi ultymyz qazaq bolǵandyqtan, osy eldiń azamaty bolǵandyqtan bul bizdiń paryzymyz.
Osy dúkenniń Almatydaǵy barlyq bólimshelerinde osylaı qyzmet kórsetiledi me?
Iá, biz jumysqa qyzmetker qabyldaıtyn kezde, eń basty nazar aýdaratyn talabymyz ol til tazalyǵy. Bizdiń basshylyqtyń talaby osy. Iaǵnı jumysqa qos tildi óte joǵarǵy deńgeıde meńgergen azamattar alynady.
Sizder tek barlyq ult ókilderine de osylaı qyzmet kórsetesizder me?
Bizge kelgen klıent qazaq bolsa, biz onyń orys tildi ekenine qaramastan barynsha qazaq tilinde qyzmet kórsetýge tyrysamyz. Al eger túsinbeı bara jatsa, orys tiline kóshýimizge týra keledi. Biz barynsha qazaq tiliniń týyn bıik ustaýǵa tyrysamyz.
«SMAN» brendiniń aıaq kıimderi qaı elde tigiledi, álde otandyq ónim be?
Biz bul aıaq kıimderdi Túrkıadan ákelemiz. Al Sman degenimiz ol ózimizdiń qazaqı esim. Bizdiń aıaq kıimniń sapasy óte joǵary, jáne sıyr, qoı terisinen tigiledi. Bul teriniń túrleri organızmge zıan keltirmeıdi. Al tabanyna keler bolsaq, Italıada tigiletin aıaq kıim tabandary bizdiń aıaq kıimderde de qoldanylǵan. Baǵasy salystyrmaly turǵyda, ózge brendterden áldeqaıda arzan. Bizdegi ortaq baǵa 25-30 myńnyń aralyǵynda. Mundaı sapa úshin bul árıne qol jetimdi.
Sizder osylaı qyzmet kórsetip, dúıim jurtty ózderińizge baýrap kelesizder. Sizderge qarap boı túzep, osylaı memlekettik tilge kóńil bólip jatqandar bar ma?
Árıne, bizge kóptegen elge tanymal tulǵalar kelip jatady. Estıtinimiz kóp kompanıalar óz qyzmetkerlerine «SMAN-nyń» jigitterinen úırenińder dep, bizdi úlgi etip otyratyn kórinedi. Bul árıne, qýanarlyq nátıje.
Tipti, keıbir klıentter aıaq kıim almasa da bizben sóılesip, qyzmetimizdi tamashalap ketýge qumar. Qazaq tili – óte kórkem yrǵaqty til. Menińshe, qazir qoǵamda tildi durys paıdalana almaǵandyqtan onyń qadir-qasıetin baǵalaı almaı jatyrmyz. Ár tildi óz kemelinde kórkemdep sóılese, ol tyńdaýshynyń qulaǵyna jaǵary sózsiz. Biz ana tilimizde durys sóıleı bilý kerekpiz.
Sizderge tabys, eńbekterińizge bereket, árdaıym qazaq tiliniń abyroıyn asqaqtatyp júre berýlerińizge tilektespin.
