«Salt-dástúrlerimiz, tilimiz ben mýzykamyz, ádebıetimiz, joralǵylarymyz, bir sózben aıtqanda ulttyq rýhymyz boıymyzda máńgi qalýǵa tıis».
2017 jyldyń 11 mamyrynda Ortalyq komýnıkasıalar qyzmetinde «Qazaqstan» RTRK» AQ uıymdastyrýymen «Men qazaqpyn» atty halyqaralyq megajobaǵa baılanysty baspasóz maslıhaty ótti dep habarlaıdy Qamshy aqparattyq agenttigi.
Sharaǵa QR Aqparat jáne komýnıkasıalar mınıstri Dáýren Abaev pen «Qazaqstan» RTRK» AQ Basqarma tóraǵasy Erlan Qarın qatysty.
«Qazaqstan» RTRK» AQ atadan balaǵa mıras bolǵan ult ónerin urpaqqa nasıhattaý maqsatynda «Men-qazaqpyn» atty halyqaralyq megajobaǵa baıqaý jarıalady. Bul aýqymdy baıqaýǵa qazaqstandyqtardan basqa, Reseı, Qytaı Halyq respýblıkasy, Monǵolıa men Altaıda turatyn qandastarymyz da qatysyp, qazaq óneriniń baı mýzykasyn halyqqa keńinen tanytýǵa jol ashatyn bolady.
Jobanyń maqsaty, tól ónerimiz - jyr-termelerdi, kúıdi odan ári damytyp, búgingi kún talabyna sáıkes jańashalandyryp, óskeleń urpaqqa jetkizý. Árbir oblys ortalyqtarynda arnaıy irikteý týrlary ótkizilip, eń júıriktileri Respýblıkalyq televızıalyq baıqaýǵa joldama alady. Elimizge tanymal termeshiler, kúıshiler men jyrshylardan quralǵan qazylar alqasy qatysýshylardy iriktep alady.
Baıqaýǵa qatysatyn úmitkerlerdiń sahnalyq kıimi qazaqy úlgimen tigilgen, búgingi zamanǵa saı bolýy kerek.
Sondaı-aq, Basqarma tóraǵasy jobanyń irikteý týrlary boıynsha arnaıy keste qurylǵanyn atap ótti. Óńirlerdegi alǵashqy baıqaýlar Almaty qalasy jáne Aqtóbe oblysynan maýsym aıynyń 5-nen bastalady. Shildede Reseı, Qytaı jáne Mońǵolıada baıqaýlar ótkiziledi. İrikteý týrynan túsirilgen kúndelikter Ulttyq arna efırinen 9-27 tamyz aralyǵynda kórsetiledi.
Al, joba kórermenge aǵymdaǵy jyldyń 3-qyrkúıeginen bastap jol tartady. «Kúndelikterdi túsirý maqsatynda arnaıy eki shyǵarmashylyq top quryldy. Bir topty tanymal kúıshi Aıbek Bekbosyn, ekinshi topty dástúrli ánshi Allajar Qaıbar júrgizedi. Jobany júzege asyrý úshin oblystyq fılıaldar atsalysatyn bolady», - dedi E.Qarın.
Aıta ketsek, joba 10-jeltoqsanda qorytyndylanyp, Táýelsizdik kúni qarsańynda elordada gala-konsert uıymdastyrylatyn bolady.
Úmitkerlerdiń tapsyratyn qujattary:
- jeke bas kýálikteriniń kóshirmesi;
- ómirbaıany;
- oqıtyn (oqýshylar men stýdentter úshin), jumys isteıtin jerinen anyqtama;
- sapaly elektrondy nusqadaǵy sýreti;
- ár kezeńde oryndalatyn shyǵarmalar tizimi.
Konkýrsqa qatysýshylardyń ótinishteri konkýrstyń bastalýynan 20 kún buryn jergilikti jerdegi uıymdastyrýshylardyń elektrondy adresine jiberilýi tıis:
Baıqaýdyń jeńimpazdary Astana qalasynda bas qosyp, baǵdarlama aıasynda arnaıy statýetkamen, sonymen qatar, «Jyldyń eń úzdik dástúrli ánshisi», «Jyldyń eń úzdik termeshisi», «Jyldyń eń úzdik kúıshisi» jáne baıqaı laýreaty nomınasıalarymen marapattalady. Baıqaý boıynsha tolyq aqparat alý úshin Strategıalyq marketıń departamentine habarlasý qajet.
