Qytaı Jibek joly qoryna (JJQ) qosymsha 100 mlrd. ıýán (15 mlrd-qa jýyq dollar) baǵyttaıdy. Bul týraly «Bir beldeý, bir jol» strategıasy sheńberinde halyqaralyq yntymaqtastyq boıynsha joǵary deńgeıdegi  Forýmnyń ashylýynda QHR Tóraǵasy Sı Szınpın málimdedi, dep habarlaıdy QazAqparat.

«Qytaı   bastamany júzege asyrý úshin (Bir beldeý, bir jol) Jibek joly qoryna qosymsha 100 mlrd. ıýán quıady. Biz qarjy ınstıtýttaryn 300 mlrd. ıýán shamasynda baǵalanǵan operasıalardy ıýánmen júrgizýge shaqyramyz. Qytaılyq damý banki jáne Qytaı EKSIM-banki sáıkesinshe 200 mlrd. ıýán jáne 130 mlr.d ıýán mólsherinde  ınfraqurylymdardy, ónerkásip qýatyn jáne qarjylandyrýdy qoldaýdyń  arnaıy kredıtteý sqemasyn qurady», – dedi ol.

Eske sala ketsek, Qytaı Jibek joly qoryna (JJQ) 2014 jylǵy jeltoqsanda «Bir beldeý, bir jol» strategıasy sheńberinde júzege asyrylatyn ınfraqurylymdyq jobalardy qarjylaı qamtamasyz etý maqsatynda qurylǵan. Osy ýaqytqa deıin ony kapıtaldandyrý somasy 40 mlrd. dollardy qurady.

Forýmǵa 29 memleket, 3 halyqaralyq uıym  (BUU, Dúnıejúzilik bank, Halyqaralyq valúta qory) basshylarymen birge Qazaqstan Prezıdenti Nursultan Nazarbaev qatysýda.

Forýmnyń basty maqsaty – yntymaqtastyqty jandandyrý baǵyttaryn talqylaý, ózara is-qımyl platformalaryn qalyptastyrý jáne yntymaqtastyq nátıjeleri boıynsha tájirıbe almasý.

İs-sharada ınfraqurylymdyq baılanys, saýda-ekonomıkalyq yntymaqtastyq, ónerkásiptik ınvestısıalar, energetıka men resýrstar, qarjylyq qoldaý, qorshaǵan ortany qorǵaý sıaqty mańyzdy máseleler talqylanýda.