2017 jyldyń 15 mamyrynda Kıshınev qalasynda Qazaqstannyń Ýkraınadaǵy elshisi jáne Moldova Respýblıkasyndaǵy elshisi mindetin qosa atqarýshy Samat Ordabaev Moldovanyń Premer-mınıstri Pavel Fılıppen kezdesý ótkizdi, dep habarlaıdy Qamshy aqparattyq agenttigi QR SİM baspasóz qyzmetine silteme jasap.

Kezdesý barysynda eki memlekettiń ekonomıkalyq ózara is-qımyl máseleleri talqylandy. Taǵam ónerkásibi, shıkizatty óńdeý, ósimdikterdi ósirý tehnologıasy men seleksıasy, týrızm jáne bilim alý salasyndaǵy yntymaqtastyqty keńeıtý qajettiligi atap ótildi. «Jańa Jibek joly» jobasynyń sheńberinde eýroazıattyq transport dálizderin qurý mańyzdylyǵy aıtyldy.

Taraptar Eýrazıalyq ekonomıkalyq odaq, Ortalyq Azıa, Qytaı, Iran men Parsy shyǵanaǵy elderi naryqtaryna shyǵarýǵa jol ashatyn Qazaqstanda birikken kásiporyndardy ashý perspektıvtiligin basa aıtty .

Elshi  «Qazaqstannyń úshinshi jańǵyrýy: jahandyq básekege qabilettilik» Qazaqstan Prezıdenti Nursultan Nazarbaevtyń jyl saıynǵy joldaýynda belgilengen elimizdiń damý basymdyqtary, konstıtýsıalyq reformalardyń qorytyndylary men Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasymen tanystyrdy.

Al P. Fılıp Prezıdent N. Nazarbaevtyń memleketti qurý men qalyptasýyndaǵy negizgi rólin, Qazaqstannyń álemdik arenadaǵy belsendi ári jaýapty saıasatyn erekshe atap ótti. Moldovalyq taraptyń Qazaqstanmen dostyq pen yntymaqtastyqty kúsheıtý baǵytyn rastady.

Suhbattasýshylar aldaǵy ýaqytta ótkiziletin Saýda-ekonomıkalyq yntymaqtastyq boıynsha qazaqstandyq-moldavalyq úkimetaralyq komısıanyń uıymdastyrý suraqtaryn talqylady.