Atyraý oblysynda otandyq bıznestiń nazaryn shoǵyrlandyrýǵa arnalǵan salanyń biri – jer qoınaýyn paıdalanýshylardyń satyp alýlary

Bul týraly «Atameken» QR Ulttyq kásipkerler palatasynyń Tóralqa Tóraǵasy Tımýr Qulybaev Atyraý oblysynyń bıznes-qoǵamdastyǵymen kezdesý barysynda aıtty.

«Búginde «Teńizshevroıl» kompanıasynyń keleshektegi keńeıtý jobasy men osy proseske otandyq bıznestiń qatysýy Atyraý oblysyndaǵy eń ózekti másele bolyp otyr. Bul onyń aldaǵy ýaqytta damýyna arnalǵan negizgi draıverlerdiń biri. Atyraý oblysynda jer qoınaýyn paıdalanýshylary satyp alýlarynyń kólemi shamamen 170 mlrd teńge. Bul «Samuryq-Qazyna» AQ jelisindegi satyp alýlardan kóp, sondaı-aq memlekettik satyp alýlar kóleminen úsh ese joǵary. Sondyqtan bizdiń kásipkerler osy múmkindikti tolyqtaı paıdalanýy kerek», – dep naqtylady Tımýr Qulybaev.

Sonymen qatar «Atameken» basshysy bıznesti shaǵyn ındýstrıaldyq aımaqty qurý jáne damytý máselesine nazar aýdarýǵa shaqyrdy. Onyń aıtýynsha, bul kásipkerlikti damytýdyń qosymsha tetigi.

«Elimizde iri ındýstrıaldyq aımaqtar qurylyp jatyr. Atyraýda «Ulttyq ındýstrıaldyq munaı-hımıa tehnoparki» arnaıy ekonomıkalyq aımaǵy bar. Bul negizinen iri jáne orta bızneske arnalǵan tetik. Qalada shaǵyn bızneske arnalǵan shaǵyn ındýstrıaldyq parkin qarastyrý kerek dep esepteımin. Mysaly, jumys istemeıtin eski kásiporyn bolýy múmkin, munda ınfraqurylym júrgizilgen oryn bar, ıaǵnı óz isin endi bastaǵan kásipker bıznesin damytý úshin ony paıdalana alady. Onyń ústine, mundaı jobalarǵa qomaqty qarjy quıý talap etilmeıdi», – dep atap ótti Tımýr Qulybaev.

Atyraý oblysy kásipkerler palatasynyń dırektory Asylbek Jákıev jergilikti qamtý úlesin arttyrý boıynsha atqarylyp jatqan jumystar jaıynda baıandady.

Onyń aıtýynsha, «Teńizshevroıl» JSHS men Óńirlik kásipkerler palatasynyń arasynda ózara yntymaqtastyq ornaǵan. Nátıjeli áriptestik úshin aldyn ala biliktilin anyqtaý máselesinde, óńirdiń ǵana emes, túgeldeı eldiń bıznes sýbektilerin qoldaýǵa baǵyttalǵan V2V kezdesýler men túrli is-sharalardy ótkizýdi uıymdastyrýda tıimdiligi joǵary ádister bar.

«Teńizshevroıl» kompanıasynyń Otandyq naryqty damytý departamenti jergilikti jáne basqa oblys kompanıalaryn tartý úshin tenderge qatysty saýaldaryn Óńirlik kásipkerler palatasyna joldaıdy. «Atameken» Ulttyq kásipkerler palatasynda shaǵyn jáne orta bıznes boıynsha elimizdiń barlyq óńirlerin qamtıtyn keńeıtilgen derekter bazasy bar. Sonymen qatar ózara yntymaqtastyq aıasynda materıaldyq-tehnıkalyq qamtamasyz etý bólimimen de qarqyndy jumys júrip jatyr. Tehnıkalyq qyzmettiń 20 túrin kórsetetin jetkizýshilerdiń birlesken forýmy nátıjesinde respýblıkanyń 200-den astam qatysýshy-kompanıa qamtyldy. Sol kompanıalardyń birazy «Teńizshevroılmen» tyǵyz baılanys ornatyp, oǵan óz qyzmetteri men taýarlaryn usynyp otyr», – dedi Asylbek Jákıev.

Eger «bir tereze» qaǵıdasy týraly aıtsaq, onda Óńirlik kásipkerler palatasy «Alash» málimetter bazasy júıesiniń operatory bolyp otyrǵan «Algorıtm KZ» kompanıasymen jumys isteıdi. Bul bazaǵa tirkelgen kásipker birden 3 operatordyń áleýetti jetkizýshisi bolady. Óńirlik kásipkerler palatasynyń qyzmetkerleri osy júıeniń kómegimen kún saıyn shaǵyn jáne orta bıznes ókilderine túrli keńes berý qyzmetin kórsetedi. Búgingi tańda bazaǵa 19 kompanıa tirkelgen.

Bolashaqta bıznestiń barlyq sýbektilerine ortaq bolatyn «bir tereze» fýnksıasyn oryndaý úshin «Teńizshevroıl» kompanıasy men Ulttyq kásipkerler palatasy arasynda kelisimge qol qoıý mindeti tur. Bul qujat kompanıanyń barlyq jobalarynda otandyq qamtý úlesin ulǵaıtýǵa jol ashyp, jer qoınaýyn paıdalanýshy kompanıaǵa da, Qazaqstan kásipkerlerine de tıimdi bolmaq.