Iranda búgin prezıdent saılaýy ótedi. Daýys berý júıesi bastalyp ketti. Prezıdenttikke úmitker tórt adam bar. Biraq olardyń ekeýi - is basyndaǵy prezıdent, saıasatker Hassan Roýhanı men konservator, burynǵy prokýror Ebrahım Raısı favorıt sanalady. Jumyssyzdyq deńgeıi joǵary Iranda 81 mıllıon halyq turady.

Álemdik derjavalarmen Tegerannyń ıadrolyq baǵdarlamasyn shektep, esesine Iranǵa salynǵan halyqaralyq sanksıalardy joıý týraly kelisim jasasqan Roýhanı Batys elderimen odan ary yntymaqtasyp, azamattarǵa keńirek bostandyq berýge ýáde etip otyr, dep jazady Azattyq.

68 jastaǵy Roýhanı qarsylastarymen taıaýda ótkizgen saılaýaldy debatynda "19 mamyrda azamattarymyz beıbitshilik jolymen ary qaraı júre beremiz be, ıa saıası eges jolyn tańdaımyz ba degenge daýys beredi" dep málimdedi.

56 jastaǵy Ebrahım Raısı Irannyń rýhanı kósemi aıatolla Álı Hameneıdiń senimdi ókili sanalady. Aıatolla Álı Hameneı - eldegi úlken saıası, áskerı jáne dinı bıligi bar eń yqpaldy adamdardyń biri.

Sholýshy: Gúlim Jaqan