Prezıdenttikke kandıdat azamat óz mindetterin oryndaýǵa kedergi keltiretin aýrýlardyń joqtyǵyn rastaýy qajet. Mundaı talap QR Parlamenti Májilisiniń jalpy otyrysynda talqylanyp jatqan «QR-nyń keıbir konstıtýsıalyq zańdaryna ózgerister men tolyqtyrýlar engizý týraly» QR Konstıtýsıalyq zańynyń jobasynda kózdelgen, dep habarlaıdy Qamshy aqparattyq agentti QazAqparat aqparatyna súıenip. 

«Konstıtýsıalyq zań jobasy Prezıdenttiń zań shyǵarý bastamasy tártibimen ázirlengen. Ol jeke konstıtýsıalyq zańdardy Konstıtýsıadaǵy túzetýlerge sáıkes keltirýge baǵyttalǵan. Ózgertýler 8 Konstıtýsıalyq zańdarǵa engiziledi. «Prezıdent týraly» Konstıtýsıalyq zańda Prezıdenttiń ókilettikteri konstıtýsıalyq túzetýlerge sáıkes keltiriledi. Atap aıtqanda, Prezıdent Parlament Májilisimen konsýltasıalardan keıin Premer-Mınıstr engizgen usynys negizinde Úkimet múshelerin qyzmetke taǵaıyndaıdy. Sonymen qatar, Parlament depýtattary Konstıtýsıada bekitilgen tártippen Úkimet múshesin qyzmetinen bosatý týraly ótinish jasaǵan jaǵdaıda, Prezıdent ony qyzmetinen bosatady. «Prezıdent týraly» Konstıtýsıalyq zańnan Prezıdenttiń kelesi zań shyǵarý fýnksıalary alyp tastalady: zańdyq kúshi bar Jarlyqtardy shyǵarý, zań jobasyn shuǵyl dep jarıalaý, Úkimetke zań jobasyn Májiliske engizýdi tapsyrý, jáne Úkimet aktileriniń kúshin joıý», - dedi zań jobasyn tanystyrǵan Ádilet mınıstri Marat Beketaev.

Mınıstrdiń aıtýynsha, «Tuńǵysh Prezıdent - Elbasy týraly» Konstıtýsıalyq zańynda Qazaqstannyń Tuńǵysh Prezıdentiniń «Elbasy» retindegi ataýy men mártebesine qatysty túzetýler engiziledi. «Parlament jáne onyń depýtattarynyń mártebesi týraly» Konstıtýsıalyq zań jańa 22-1 babpen tolyqtyrylady. Ol Úkimet músheleriniń kandıdatýralaryn Májilispen kelisý tártibin anyqtaıdy. Konsýltasıalar Májilistiń tıisti beıindi komıtetterinde ótetin bolady. Tıisti kandıdatýralardy Premer-Mınıstr, nemese ol ókilettik bergen laýazymdy tulǵa usynady. Árbir talqylanatyn kandıdatýra jóninde Májilistiń tıisti komıteti qorytyndy shyǵaratyn bolady.

«Úkimet týraly» Konstıtýsıalyq zańynda, konstıtýsıalyq túzetýlerge sáıkes, Úkimet quramyna kirmeıtin ortalyq atqarýshy organdardy joıý boıynsha ózgerister engiziledi. Sonymen qatar, Úkimettiń Prezıdent pen Parlament arasyndaǵy qarym-qatynasyn retteıtin normalar bekitiledi. Úkimet Parlament Májilisiniń ókilettik merzimi aıaqtalǵansha qyzmet etedi jáne jańadan saılanǵan Parlament Májilisiniń aldynda ókilettigin toqtatady. «Saılaý týraly» Konstıtýsıalyq zańynda saılaýshylar men saılaý úderisine qatysýshylardyń quqyqtyq saýattylyǵyn arttyrý maqsatynda túzetýler kózdelgen. Prezıdenttikke kandıdatqa qoıylatyn qosymsha talaptar engiziledi. Olar: memlekettik qyzmette nemese saılanatyn memlekettik laýazymdarda keminde 5 jyl tájirıbesiniń bolýy, mindetterin oryndaýǵa kedergi bolatyn aýrýlardyń joqtyǵyn rastaý. «Konstıtýsıalyq Keńes týraly» Konstıtýsıalyq zańǵa qarastyrylǵan ózgeriske sáıkes, Prezıdenttiń adam retindegi jáne azamattyq quqyqtary men bostandyqtaryn qorǵaý, memlekettiń, ulttyq qaýipsizdigin qamtamasyz etýge qatysty ótinishti Konstıtýsıalyq Keńeske joldaý quqyǵy kózdelgen. Óz kezeginde Konstıtýsıalyq Keńeske júginýdiń jáne Keńestiń sheshim qabyldaýynyń saldary anyqtalady», - dedi Beketaev.

Munan bólek, «Sot júıesi men sýdıalardyń mártebesi týraly» Konstıtýsıalyq zańǵa Joǵarǵy sottyń sot praktıkasyn túsindirý fýnksıasyn júzege asyrýdy naqtylaýǵa baǵyttalǵan túzetýler engiziledi. Sonymen qatar, sýdıalyqqa kandıdattarǵa konkýrstyq talaptar belgilenedi. Olardy kúsheıtý maqsatynda aýdandyq sot sýdıasy kandıdattarynyń jasy qaıta qaralady.

«Respýblıkalyq referendým týraly» Konstıtýsıalyq zańǵa ózgertýler engiziledi. Referendýmda respýblıkanyń birtutastyǵy men aýmaqtyq tutastyǵy, ony basqarý nysany, jáne Qazaqstan Respýblıkasynyń Tuńǵysh Prezıdenti - Elbasynyń mártebesi máseleleri qarastyrylmaıdy», - dep atap ótti mınıstr.