Soltústik Qazaqstan oblysy Óńirlik keńesinde mashına-traktor parkin damytý talqylandy dep habarlaıdy Qamshy aqparattyq agenttigi. 

«Atameken» QR UKP Tóralqa Tóraǵasy Tımýr Qulybaev Óńirlik keńestiń keńeıtilgen jıynyn ótkizdi. Keńes otyrysyna Soltústik Qazaqstan Oblysynyń ákimi Qumar Aqsaqalov pen óńirdegi bıznes ókilderi qatysty.

Jıyndy ashqan Tımýr Qulybaev «Atameken» úsh jyl ishinde memlekettik organdardyń barlyǵymen tyǵyz baılanys ornata alǵanyn atap ótti. Eń aldymen mınıstrlikter, quqyq qorǵaý organdary jáne parlamentpen baılanys júzege asyryldy.

«Búginde kásipkerler, ásirese, shaǵyn jáne orta bıznestiń óz quqyǵyn qorǵaýǵa, memlekettik organdardan qajetti ruqsat qujattaryn alýǵa múmkindigi bolýy úshin, sondaı-aq memlekettik qoldaýdy sezinýi úshin óńirlik deńgeıde baılanys ornatý mindeti tur. Osylaısha, óńirdegi kásipkerlikti damytý, jumys oryndaryn ashý sekildi tıimdi jumystar atqarylady», ­– dedi Tımýr Qulybaev.

Soltústik Qazaqstan oblysynyń kásipkerleri aýyldyq jerdegi shaǵyn kásipkerlik úshin qarjylyq resýrstarǵa qol jetkizýdiń qıyndyǵyn aıtty.

Qazirgi tańda oblysta aýyldyq jerdegi kásipkerlikti qarjylandyrý úshin 19 mıkronesıelik uıym men 13 aýyldyq nesıelik seriktestik jumys isteıdi. Alaıda, kásipkerlerdiń aıtýynsha, bul nesıelik uıymdarda birshama olqylyq bar: qysqa merzimdi nesıeniń syıaqy mólsherlemesi joǵary; seriktestik qatysýshylary men aýyl sharýashylyǵy jobalaryn ǵana qarjylandyrady.

Kásipkerler «Atameken» Ulttyq kásipkerler palatasynyń mıkronesıeleý boıynsha tájirıbesin Soltústik Qazaqstanǵa da engizýdi usyndy. Tımýr Qulybaev bul bastaǵa qoldaý bildirdi.

«Byltyr alty oblysta pılottyq jobany uıymdastyrdyq. Nátıjesi kóńil qýantarlyqtaı. Barlyǵy da jaqsy jumys isteýde. Oblysta ósimdik jáne mal sharýashylyqtary bar, qajetti quraldardyń barlyǵy da oryn alǵan. Sondyqtan bul tájirıbeni qarastyrý qajet. Ákimdikterdiń mıkronesıelik uıymdarda qor qurýyna ruqsat berýi úshin QR Úkimetiniń otyrysynda bul máseleni talqylaımyz. Sonda sizderde qarajat qory paıda bolady», ­– dedi Tóralqa Tóraǵasy.

Tımýr Qulybaev nashar úlgi ǵana emes, sondaı-aq jaǵymdy úlgi de kópshilikke áser etetin atap ótti.

«Bul tańdanarlyq áser. Eger bir adam oqyp, kásibin ashyp, tez arada jaqsy jetistikterge jetip jatsa, ózgeler de oǵan qyzyǵyp, qashan, qalaı, qaıda ekenin, ol úshin ne isteý kerektigin bilgisi keledi», – dedi Tımýr Qulybaev.

Kásipkerlerdiń usynysyn Soltústik Qazaqstan oblysy ákimi Qumar Aqsaqalov ta qoldady.

«Búginde Nátıjeli jumyspen qamtý jáne jappaı kásipkerlikti damytý baǵdarlamasy boıynsha jumys istep jatyrmyz. Baǵdarlama aıasynda 1,6 mlrd teńge bólinedi. Osy qarjyny júıeli jumsaý kerek. Mıkronesıeleý uıymdary arqyly jumys isteý qolaıly», – dedi Qumar Aqsaqalov.

 Oblys ákimi mashına jasaý salasy damý máselesin qozǵady.

«Mashına jasaý salasyn damytýǵa kúsh salamyz. Aýyl sharýashylyǵy el ekonomıkasynyń draıveri bolýy kerek, bul Elbasynyń aldymyzǵa qoıǵan mindetteriniń biri. Sharýalar óte sapaly tehnıkamen jumys isteýi qajet ekeni anyq. Egistikterde amerıkalyq John Deere traktorlary men kombaındary jumys istep jatqanyna 20 jyl boldy. Bul tehnıka ýaqytpen synalǵan. Búginde biz bir gektardan 25 sentnerge deıin óndiremiz. Alaıda ónim jınaý baıaý júrip jatyr, bizge ónimdiligi joǵary tehnıka qajet», – dedi SQO ákimi.

Tımýr Qulybaev óńir basshysynyń sózin quptap, Soltústik Qazaqstan oblysynyń mashına jasaýda áleýetiniń joǵarylyǵyn atap ótti.

Qazirgi tańda oblysta 13 myń birlikten astam traktor, 7 myń birlik kombaın jáne 1 myń birlik egin egý kesheni bar. Alaıda jasalǵan saraptamaǵa sáıkes mashına-traktorlardyń 50%-nyń tozyǵy jetken, demek, tehnıkany jańartý kún tártibindegi basty másele.

«Atameken» UKP Tóralqa Tóraǵasy Óńirlik keńestiń keńeıtilgen otyrysyn qorytyndylaı kele, jıynda ózekti máseleler kóterilgenin aıtty, Ulttyq kásipkerler palatasy bul máselelerdi oblys ákimdigimen birlesip sheshpek.