«Nur Otan» partıasy Tóraǵasynyń Birinshi orynbasary Muhtar Qul-Muhammedtiń jetekshiligimen partıa delegasıasy Japonıaǵa bardy. Sapardyń basty maqsaty – halyqaralyq jáne partıaaralyq yntymaqtastyqty nyǵaıtý jáne eldiń basty saıası kúshi Lıberaldy-demokratıalyq partıamen tyǵyz qarym-qatynas ornatý.
Japondar búgingi jetistikteriniń barlyǵyna dál osy Lıberaldy-demokratıalyq partıanyń ekonomıkalyq reformalardy sátti júzege asyrýynyń arqasynda qol jetkizdi. Bul partıa elde jarty ǵasyrdan astam ýaqyt boıy basymdyqqa ıe bolyp, bılik tutqasyn qolyna berik ustap kele jatqan basty saıası kúsh. Sondyqtan onyń tájirıbesi men júrip ótken jolynan Qazaqstannyń úıreneri kóp.
Sonaý 1955 jyldan beri damýdyń dańǵyl jolyna túsip, japon halqyn jarqyn bolashaqqa bastap kele jatqan partıa rasymen Japonıany álemniń eń damyǵan elderiniń aldyńǵy legine shyǵardy. Búginde Kúnshyǵys eli dúnıe júzinde ishki jalpy ónim (İJÓ) jáne ónerkásiptik óndiris kólemi jóninen 3-oryn alady.
«Memleket basshysynyń barlyq bastamasyn, sonyń ishinde Rýhanı jańǵyrýdy júzege asyrýda «Nur Otan» partıasyna erekshe mindetter júktelgen. Ótken HH ǵasyrdyń basynda-aq Alash qaıratkerleri jańa memleket qurýda Japonıa tájirıbesinen úlgi alýǵa shaqyrǵan. Bul týraly jas Muhtar Áýezov pen Sultanmahmut Toraıǵyrov arnaıy maqala jazǵan. Sondyqtan da bizge Japonıanyń búgingi ǵajaıyp ekonomıkalyq tabystarynyń bastaýynda turǵan Lıberaldy-demokratıalyq partıanyń tájirıbesi asa mańyzdy», – dep atap ótti Muhtar Qul-Muhammed.
Sapary barysynda «Nur Otan» partıasy Tóraǵasynyń Birinshi orynbasary Japonıanyń premer-mınıstri Sındzo Abemen, eldegi basty saıası kúsh sanalatyn bıleýshi Lıberaldy-demokratıalyq partıanyń Bas hatshysy Tosıhıro Nıkaımen, Japonıa Parlamentindegi Qazaqstanmen dostyq lıgasynyń tóraǵasy Takeo Kavamýramen kezdesip, ekijaqty kelissózder júrgizdi.
Oraıy kelgende aıta ketken jón: Muhtar Qul-Muhammedtiń ózi de japon ádebıeti týraly zertteý maqalalar jarıalaǵanyn bilemiz. Mınıstr bolyp turǵanda Qazaqstannyń Japonıadaǵy kúnderin zor tabyspen ótkizgen Muhtar myrzanyń «Nur Otanǵa» kelgennen keıin bul úrdisti saıası dıalog deńgeıine kóterýi Alash amanatynyń jańa ǵasyrda jalǵasyn tabýy dep qarastyrǵan jón.
