Memleket basshysyna jolaýshylar júrdek poıyzdary qozǵalysyn damytý baǵdarlamasynyń iske asyrylýy jóninde, sondaı-aq «Vokzal kesheni qurylysyn qamtıtyn Astana temirjol torabyn damytý» jobasynyń oryndalý barysy týraly baıandaldy dep habarlaıdy Qamshy aqparattyq agenttigi Aqordaǵa silteme jasap.

Qazaqstan Prezıdenti ınfraqurylymdyq nysandy aralap kórý barysynda aqparat quraldary ókilderiniń aldynda sóz sóıledi.

– Sanaýly kúnderden soń «EKSPO-2017» kórmesi ashylady. Osyǵan oraı búgin elordanyń jańa nysandaryn aralap kórdim. Bul jańa qurylystar – Astananyń maqtanyshy. Búkil Eýropa men Azıany túgelge jýyq qamtıtyn jańa áýe baǵdarlary paıda bolýda. Jańa nysandar bas qalamyzdyń jańa kelbetin aıshyqtaıdy. «Nurly jol» vokzaly – biregeı nysan, postkeńestik keńistikte mundaı vokzal joq, – dedi Nursultan Nazarbaev.

Sonymen qatar, Memleket basshysy Astanadan elimizdiń barlyq óńirine joǵary jyldamdyqpen jetkizetin «Talgo» poezdarynyń júre bastaǵany jaqsy jańalyq ekenine toqtalyp, ınfraqurylym jáne kólik salasyndaǵy damýymyzdyń qarqyn ala túskenin atap ótti.

– Osynyń barlyǵy memleketimizdiń bolashaǵy úshin jasalýda. Bul jobalar «Nurly jol» baǵdarlamasy aıasynda júzege asyryldy. Jańa termınaldy iske qosý arqasynda áýejaıdyń jolaýshylardy ótkizý múmkindigi jylyna úsh mıllıonnan segiz mıllıon adam mólsherine deıin artady. «EKSPO-2017» kórmesiniń barlyq qonaqtary Astanaǵa osy jańa nysandar arqyly keledi, – dedi Qazaqstan Prezıdenti.

Vokzal kesheni – jalpy alańy 126 myń sharshy metr bolatyn alty deńgeıli ǵımarat. Oǵan poıyzdardy qabyldap-jóneltetin alty jol jalǵasady. Jolaýshylardy poıyzǵa otyrǵyzý men túsirý úshinshi qabat arqyly júrgiziledi. Vokzal jolaýshylar aǵynyn, adamdar kezegin, qaýipsizdikti, bıletti elektrondyq tásilmen satý isin basqarý men baqylaýdyń zamanaýı ozyq ıntellektýaldyq júıelerimen jabdyqtalǵan.