Qazaqstan Respýblıkasynyń Memlekettik hatshysy Gúlshara Ábdiqalyqova saıası qýǵyn-súrgin jáne asharshylyq qurbandaryna arnalǵan monýment aldynda ótken «Azaly tarıhqa taǵzym» atty mıtıńke qatysty, dep habarlaıdy Qamshy aqparat agenttigi Aqordanyń baspasóz qyzmetine silteme jasap.
Mıtıńke qatysýshylar saıası qýǵyn-súrgin qurbandaryn bir mınýt únsizdikpen eske alyp, qaıta jóndelgen monýmentke gúl shoqtaryn qoıdy.
Memlekettik hatshy 3 mıllıonnan astam adam saıası qýǵyn-súrgin jáne asharshylyq qurbany bolǵanyn aıtty. G.Ábdiqalyqova Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasynda «Ótken HH ǵasyr halqymyz úshin qasiretke toly, zobalań da zulmat ǵasyr boldy. Birinshiden, ulttyq damýdyń yqylym zamannan jalǵasyp kele jatqan ózimizge ǵana tán joly birjola kúıretilip, qoǵamdyq qurylymnyń bizge jat úlgisi eriksiz tańyldy. Ekinshiden, ultymyzǵa adam aıtqysyz demografıalyq soqqy jasaldy. Onyń jarasy bir ǵasyrdan beri áli jazylmaı keledi. Úshinshiden, qazaqtyń tili men mádenıeti qurdymǵa kete jazdady. Tórtinshiden, elimizdiń kóptegen óńirleri ekologıalyq apat aımaqtaryna aınaldy» degen sózder aıtylǵanyna toqtaldy.
Memlekettik hatshy odan soń «Ulttyq sana: tarıhı tájirıbe jáne rýhanı jańǵyrý» atty taqyryppen ótken halyqaralyq konferensıaǵa qatysty. Sondaı-aq, konferensıaǵa oblys ákimi Q.Kósherbaev, Qazaqstan halqy assambleıasy Tóraǵasynyń orynbasary – Qazaqstan halqy assambleıasy hatshylyǵynyń meńgerýshisi D.Myńbaı, Parlament Májilisiniń depýtattary, memlekettik organdar ókilderi, Qazaqstan halqy assambleıasynyń, Qoǵamdyq kelisim keńesteriniń músheleri, óńirlik assambleıalar hatshylyqtarynyń meńgerýshileri, sheteldik jáne otandyq sarapshylar, ǵylymı jáne zıaly qaýym ókilderi, saıası qýǵyn-súrgin qurbandarynyń jáne jer aýdarylǵandardyń urpaqtary qatysty.
Memlekettik hatshy óz sózinde tarıhı sananyń kókjıegin keńeıtýge, sol kezeńniń oqıǵalary men derekteriniń ózara baılanystylyǵy men sabaqtastyǵyn kórýge múmkindik beretin, tájirıbelik maqsatty kózdegen konferensıanyń qoǵamdyq-saıası mańyzy joǵary ekenin atap ótti.
Konferensıada qazirgi zamanǵy Qazaqstan memlekettiligi turǵysynan «Alash» qundylyqtaryna, qýǵyn-súrgin, asharshylyq jáne jer aýdarý kezeńine tarıhı taldaý jasaý tájirıbesi jáne basqa da máseleler qaraldy.
Gúlshara Ábdiqalyqova Qazaqstan tarıhynyń HH ǵasyrdyń birinshi jartysyndaǵy qasiretti kezeńin talqylaý qoǵamdyq sanany jańǵyrtý úderisine qosylatyn eleýli úles ekenin aıtty.
Konferensıa qorytyndysy boıynsha forýmǵa qatysýshylar Qazaqstan halqyna arnalǵan úndeý qabyldady.
Sonymen qatar, Memlekettik hatshy «Atameken» balalar aýylyn aralap, Qorqyt Ata atyndaǵy Qyzylorda memlekettik ýnıversıtetiniń Stýdentter saraıynda boldy.
Sholýshy: Aıgerim Taýbaı
