«Ónerli órge júzer» degen halyq danalyǵyn paıymǵa alsaq, ónerdiń san-salasy bar. Sonyń biregeıi – qylqalammen órnek salyp, zaman men qoǵam, tabıǵat pen adam beınesin shynaıy somdaý arqyly keleshek urpaqty tárbıeleý bolyp tabylady. Osy qylqalam óneri – uly Jaratqannyń pendesine bergen úlken syıy. Qylqalamnyń kómegimen dúnıeýı jáne adamı qundylyqtardy naqty kórsetip, halyqtyń rýhanı-tanym serpilisine qozǵaý salýǵa ábden bolady. Osyndaı uly ónerdiń órinde júrip, onyń az-kem mehnaty men qıyndyq qaltarysyn tartyp, ózindik qoltańbamen júrgen sýretshiler qaýymy jeterlik. Osyndaı elge elenbeıtin, kózge kórinbeıtin saf ónerdiń sahnasynda kóp jyldardan beri eseli eńbek etip kele jatqan ónerli azamattyń biri – Oraz-Kózdi Esenbaev.
Sýretshi Oraz aǵa Esenbaev 1960 jyly 27 aqpanda Qyzylorda oblysy, Jalaǵash aýdany, Mádenıet aýylynda dúnıege kelgen. 1977 jyly aýdan ortalyǵyndaǵy №123 orta mektepti bitirisimen, Keńes Armıasy qatarynda Otan aldyndaǵy boryshyn óteıdi. 1980-1983 jyldary Almatydaǵy N.V.Gogol atyndaǵy Almaty Kórkemsýret ýchılıshesin támámdaǵan soń, eńbek jolyn Qyzylorda qalasynda bastap, keıin 1989-93 jyldary T.Júrgenov atyndaǵy Teatr jáne kórkemsýret ınstıtýtyn támámdaǵan. Búginde ol, Almaty «Symbat» Dızaın jáne tehnologıa Akademıasynyń sýretshi-oqytýshy qyzmetinde eńbek etip, júzdegen shákirtter tárbıeleýde. Qazaqstan Sýretshiler Odaǵynyń múshesi, birneshe márte halyqaralyq jáne respýblıkalyq Kórmelerdiń qatysýshysy, túrli marapattardyń ıesi. «Qobyznama», «Naýryz» atty tarıhı týyndylar men «Kosák» atty sybaılas jemqorlyqqa qarsy respýblıkalyq sýret kórmeleriniń avtory.
Oraz aǵa jaratylysynda óte qarapaıym, adamı bolmysy qazaqı, salmaqty oımen salıqaly tirlik etip júrgen ult óneriniń janashyry. Qylqalam sheberi – óziniń saıası-pálsapalyq tujyrymdary arqyly, asqan jańashyldyqpen, rýhshyldyqpen kórkemsýret týyndylaryn jurtshylyqqa arnap, salyp jarıa etip júr. Sonyń bir parasy tómendegi «Musylmandyq hadısteri» men «Konfýsııdiń pálsapalyq ilimine» arnalǵan eńbekteri.
Tarıhı derekterge qurylǵan, boıaý-bolmysy qanyq, mazmuny tereń, taǵylymdy da, tárbıelik úlken máni bar sýretterdi kópshilik oqyrmanǵa usynamyz. Qalyń oqyrman ózderiniń talǵamdy oılaryn ortaǵa salady degen oıdamyz.
[gallery link="file" columns="9" type="slideshow" ids="13888,13887,13886,13885,13884,13883,13882,13881,13880,13879,13878,13877,13876,13875,13874,13873,13872,13871,13870,13869,13868,13867" orderby="rand"]
Muhtar Múbárakuly,
M.O.Áýezov atyndaǵy Ádebıet jáne óner
ınstıtýtynyń kishi ǵylymı qyzmetkeri.
