Búgin Qazaqstandyq BAQ Aqorda jaqqa kóp eleńdedi. Tańerteńgilik shyqqan aqparat boıynsha Imanǵalı Tasmaǵambetov otstavkaǵa ketken. Onyń ornyna memlekettik hatshy bolǵan Ádilbek Jaqsybekov taǵaıyndaldy.
Imanǵalı Nurǵalıulynyń qyzmetinen ketýin árkim ártúrli sebepke baılanystyryp, onyń kelesi qyzmettik ornyn áralýan boljap jatty. Kóp adamnyń pikirinshe ol Memlekettik hatshy bolýy múmkin delindi. Sebebi eks-memhatshy Marat Tájın Reseıge elshi bolyp ketken soń bul oryn biraz ýaqyt bos qaldy. Bul mansapty ýaqytsha Kárim Másimov atqaryp, saıasatta tájirıbesi az Ádilbek Jaqsybekov kelgen bolatyn. Alaıda, jurt kútkendeı Tasmaǵambetov memlekettik hatshy bolmady. Aqorda baspasóz qyzmetiniń málimdemesine saı Elbasy Nursultan Nazarbaev Qorǵanys mınıstrliginiń basshylyq quramyna Imanǵalı Tasmaǵambetovti tanystyrdy. Imanǵalı Tasmaǵambetov 2002 jyldyń 28 qańtarymen, 2003 jyldyń 11 maýsymy aralyǵynda Qazaqstan Respýblıkasynyń Úkimet basshysy qyzmetin atqarǵan. Jurt Imanǵalı Nurǵalıulyn Almaty men Astana qalalaryn gúldendirýshi dep biledi.
Qorǵanys mınıstrligi de basynan kóp daý arylmaıtyn sala. Sońǵy jyldary bul salanyń basshylyǵyna qoly isker eshkim kelmeı qoıdy. Danıal Ahmetov isti bolyp ketken soń, Memlekettik hatshy bolýdyń aldynda bul qyzmetti atqarǵan Ádilbek Jaqsybekov te osy mınıstrlikti aıtarlyqtaı alǵa bastyryp jibermedi.
Aqparattyq soǵys órshelene júrip jatqan, dúnıe dúrbeleńge túsken myna zamanda eldiń qorǵanys salasyna bas sardar etip, isker adam Imanǵalı Tasmaǵambetovti taǵaıyndaýy – Elbasynyń kezekti kóregendigi bolar dep senemiz.
Ómirderek:
Imanǵalı Nurǵalıuly Tasmaǵambetov — Qazaqstan Respýblıkasynyń memleket jáne qoǵam qaıratkeri, Qazaqstan Respýblıkasynyń 5-nshi Premer-Mınıstri, 2008 jyldyń 4 sáýirinen bastap, 2014 jyldyń 22 qazanyna deıin Astana qalasynyń ákimi.
1956 jyly jeltoqsannyń 9 Gýrev oblysy, Mahambet aýdany, Novobogat aýylynda dúnıege kelgen.
1979 jyly Oral qalasynyń A. S. Pýshkın atyndaǵy pedagogıkalyq ınstıtýtynyń geografıa men bıologıa pánderiniń muǵalimi mamandyǵy boıynsha dıplomyn aldy.
1990 jyly «Dúnıetaný aspektileriniń ekologıalyk problemasy» taqyryby boıynsha dısertasıasyn qorǵap, fılosofıa ǵylymdarynyń kandıdaty ataǵyna ıe boldy. 7 jyldan keıin ol «Tranzıttik saıası júıelerindegi áleýmettik saıasat» ǵylymı zertteý jumysyn tańdap, saıasattaný ǵylymdarynyń doktory bolyp atandy.
1981 jyldan 1991 jylǵa deıin KOKP OK-ń múshesi, 1990—91 jyldarda Qazaqstan kompartıasynyń OK Polıtbúro múshesi boldy. Qazaqstan Recpýblıkasynyń 12 shaqyrylǵan Joǵarǵy Keńesiniń depýtaty bolyp saılandy.
Eńbegi men saıası ómirbaıany sol kezdegi jalǵyz jastar saıası uıymy — Qazaqstannyń LKJO-da basshylyq qyzmetimen baılanysty. 1979 jyldan Mahambet aýdanyndaǵy LKJO uıymdastyrý bóliminiń meńgerýshisi, Gýrev LKJO qalalyq komıtetiniń jáne oblystyq komıtetiniń birinshi hatshysy boldy. 1989 jyly LKJO OK,1991 jyly Qazaqstan Respýblıkasynyń jastar isi jónindegi Memlekettik komıtetin basqardy.
1993 jyly I. Tasmaǵambetov Qazaqstan Respýblıkasynyń prezıdentiniń kómekshisi bolyp taǵaıyndaldy.
1995 jyldan bastap el basqarýshy qyzmetinde joǵarǵy oryndardy atqaryp, Qazaqstannyń vıse-premeri, bilim jáne mádenıet vıse-premer-mınıstri, Qazaqstan Respýblıkasynyń Prezıdenti ákimshiliginiń jetekshisiniń orynbasary, Qazaqstan Prezıdentiniń birinshi kómekshisi, Atyraý oblysynyń ákimi, Qazaqstan premer-mınıstri, Memlekettik hatshy, Qazaqstan Prezıdenti ákimshiliginiń jetekshisi bolady.
2004—2008 jj. 1,5 mln turǵyny bar Qazaqstannyń eń iri qalasy Almatynyń ákimi qyzmetin atqaryp keldi.
2008 j. sáýirdiń 4 Qazaqstannyń elordasy — Astana qala ákimi bop taǵaıyndaldy.
QR Qaýipsizdik Keńesiniń múshesi, «Mádenı mura» atty Memlekettik baǵdarlamanyń qoǵamdyq keńesiniń tóraǵasy, IýNESKO isi jónindegi QR Ulttyq komısıasynyń tóraǵasy, Qazaqstan Respýblıkasynyń oqpen atý Federasıasynyń qurmetti prezıdenti, akademık A.H. Marǵulan atyndaǵy Halyqaralyq qor basqarmasynyń tóraǵasy.
I. Tasmaǵambetov Mońǵolıaǵa, Batys Qazaqstanǵa jáne Reseı Federasıasynyń Astrahan oblysyna (Kaspıı: munaı jáne mádenıet) jáne t.b. jerlerge Halyqaralyq mádenıettanýshylyq ekspedısıalar uıymdastyrǵan. Sonyń nátıjesinde 2000 j. Mońǵolıadan Qazaqstanǵa ejelgi túbegeıli Kúltegin tas hatynyń kóshirmesi ornatyldy. Qazaq mádenıeti men tarıhynyń muralaryn jańǵyrtyp, kópshilikke jetkizýge taǵy basqa kóp jumys atqarǵan qaıratker.
Onshaqty kitaptardyń jáne kóptegen ǵylymı eńbekterdiń avtory. Mádenıettaný, memlekettik basqarý, áleýmettik-ekonomıkalyq órkendeý problemalary jáne saıasattanýǵa baılanysty maqalalardyń avtory.
«Parasat» ordeni (1998 j)
«Qazaqstan Respýblıkasynyń Tuńǵysh Prezıdenti Nursultan Nazarbaev» ordeni (2004 j),
Orys Pravoslavıelik Shirkeýiniń «Máskeýlik Danııl qasıetti patshasy» ordeni,
Reseı Federasıasynyń «Drýjba narodov» ordenimen
jáne kóptegen alqalarmen marapattalǵan.
Úılengen, úsh balanyń ákesi.
I. Tasmaǵambetov Qazaqstan tarıhy, etnografıasy, arheologıa máselelerine tereń kóńil bólip, Ortalyq Azıa halyqtarynyń qoltańba óneriniń zattaryn jınaýmen aınalysady. Saıası qaıratker muraty — Mustafa Shoqaı, Fransýa Mıtteran.
