Halyqaralyq «EKSPO-2017» kórmesin qoldaý maqsatynda Óskemennen Elordaǵa jaıaý jol tartqan Ǵalymjan Toqtar búgin Ekibastuz qalasyna aıaldap, turǵyndardy 60 jyldyq mereıtoımen quttyqtady, dep habarlaıdy Qamshy aqparattyq agenttigi pavlodarnews.kz saıtyna silteme jasap.

Ekibastuz qalalyq dene shynyqtyrý jáne sport bóliminiń bas mamany Talǵat Sákenniń sózinshe, búgin Óskemen oblystyq sport basqarmasynyń mamandary sportshynyń qala aýmaǵyna jetkenin aıtqan.

- Marafonshymen Ekibastuz qalasynyń shetindegi stellada kezdesip, suhbattastyq. Sportshy qala turǵyndaryn bıylǵy 60 jyldyq mereıtoıymen quttyqtap, sportta zor jetistikterge jetýimizdi tiledi. Qala shetine túski saǵat 12 kezinde kelgen ol shamamen 10-15 mınýttaı aıaldaǵan soń Pavlodar-Astana avtojolymen ary qaraı ketti. Júgirisin 10-maýsym kúni Astanada aıaqtaıdy. Sonda barlyǵy 1000 shaqyrym joldy jaıaý baǵyndyrmaq, - deıdi Talǵat Sáken. 

Ǵalymjan Toqtar Óskemen qalasyndaǵy halyqqa qyzmet kórsetý ortalyǵynda ınspektor bolyp jumys isteıdi.  Ol «EKSPO-2017» kórmesiniń qurmetine oraı Astanaǵa deıin jaıaý júgirip barý úshin 25-mamyr kúni jolǵa shyqqan. Kúnine 10 saǵat júgirip, shamamen 60-70 shaqyrym joldy artqa tastaıdy. Aýaraıy qolaıly bolsa, 80 shaqyrymǵa deıin jetkizetinin aıtqan. Al, sportshynyń áıeli Erkegúl Muqıat bolsa, kólikpen ilesip, barlyq jol barysyn beıneregıstratorǵa túsiredi.