Parlament Májilisiniń tóraǵasy Nurlan Nyǵmatýlın Esep komıtetine sotqa joldanatyn materıaldardyń sapasyn joǵarylatýǵa keńes bergen. QazAqparattyń jazýynsha, bul týlay Májilistiń jalpy otyrysynda QR Úkimetiniń jáne Respýblıkalyq búdjettiń atqarylýy jónindegi esep komıtetiniń 2016 jylǵy respýblıkalyq búdjettiń atqarylýy týraly esepteriniń tyńdalýynda sóz bolǵan.
«Ótken jyly sizderdiń materıaldaryńyz boıynsha birde-bir aıyptaý úkimi shyǵarylǵan joq. Sizder zańnamalyq turǵyda tikeleı talap-aryzben sotqa júgine alatyn eldegi jalǵyz ókiletti organsyzdar. Sonymen qatar tapsyratyn materıaldaryńyz sotqa deıin jetpeı jatady.
Kóp jaǵdaılarda sizderdiń tekserýlerińiz nátıjesindegi usynylǵan materıaldardyń tómen sapasy sebebinen sotqa jetpeıtini baıqalýda. Bul turǵyda tekseris prosesi emes, onyń nátıjesi mańyzdy, ıaǵnı keltirilgen shyǵyn kólemin óteý, zań buzýshylyq úshin jaýapkershilikke tartylǵandardyń sany eskerilýi tıis. Tek sonda ǵana jumystyń tıimdiligi bolady. Biz búdjettik baǵdarlamalar ákimshileriniń, memlekettik organdardyń jaýapkershiligi týraly jıi aıtamyz. Alaıda sońǵy kezde tekserýshilerge de qatysty suraqtar týyndaýda. Tek barlyq taraptardyń ózara jaýapkershiligi kezinde ǵana memlekettik qarjyny paıdalanýda tıisti tártipti jasaı alamyz»,-degen N. Nyǵmatýlın Esep komıtetiniń tóraǵasy Nurmuhambet Ábdibekovke qaratyp aıtqan sózinde. Óz kezeginde N. Ábdibekov Komıtet jumysyna qatysty aıtylǵan syn óte oryndy ekenin, kemshilikterdi túzetý jumystaryn iske asyratynyn atap ótti.
Sóz sońynda Májilis tóraǵasy atqarylatyn jumystardyń tıimdiligin arttyrý baǵytynda Esep komıtetiniń zańnamalyq bastamalaryn depýtattar qoldaýǵa daıyn ekenin jetkizdi. Sondaı-aq ol búdjet qarjysynyń durys ıgreliýi týraly da aıtqan. Búdjettik qarjyǵa qatysty aıla-sharǵy jasaýdy doǵarý kerektigin, qarastyrylǵan qarjy shyn máninde eldiń ekonomıkasyna jumys isteýi úshin kvazımemlekettik sektordy qarjylandyrý tetigin ózgertýdi jáne búdjettik baǵdarlamalar ákimshileriniń jaýapkershiligin arttyrýdy qamtıtyn qadamdardy pysyqtaý kerektigin atap ótken.
