Ortalyq komýnıkasıalar qyzmetinde Qazaqstan Respýblıkasynyń Prezıdenti N.Á. Nazarbaevtyń júldesine at sporty túrlerinen «EKSPO KÝBOGYN» uıymdastyrý boıynsha baspasóz konferensıa ótti dep habarlaıdy Qamshy aqparat agenttigi.
Baspasóz konferensıaǵa QR Parlamenti Májilisiniń depýtaty, QR «Ulttyq sport túrleri qaýymdastyǵy» prezıdenti Bekbolat Tileýhan, QR Mádenıet jáne sport mınıstrligi sport jáne dene shynyqtyrý komıteti tóraǵasy Elsıar Qanaǵatov, QR Mádenıet jáne sport mınıstrligi sport jáne dene shynyqtyrý komıteti tóraǵasynyń orynbasary Serik Jarasbaev, Almaty oblysy ákiminiń orynbasary Jaqsylyq Omar, Almaty oblysy dene shynyqtyrý jáne sport basqarmasynyń basshysy Turatbek Charapıev qatysty.
At jarysy bıylǵy jyldyń 11 maýsymynda saǵat 10:00-de Astana qalasynyń «Qazanat» ıpodromynda bastalady. Shara uıymdastyrýshylary – QR Mádenıet jáne sport mınıstrligi, QR «Ulttyq sport túrleri qaýymdastyǵy», Astana Ákimdigi, Almaty oblysynyń ákimdigi jáne «Qazaqstannyń báıge túrleri qoǵamy». Áleýmettik seriktes «Samruk-Kazyna Trust» áleýmettik jobalardy damytý qory.
Jarys baǵdarlamasyna alaman báıge – 25 shaqyrym, top báıge – 15 shaqyrym, jorǵa attar jarysy – 7 shaqyrym, qunan báıge – 7 shaqyrym, 2400 jáne 1800 metrge ushqyr attar jarysy (gladkıe skachkı) ótedi.
Sport jáne dene shynyqtyrý komıteti tóraǵasy Elsıar Baımuhamedulynyń aıtýynsha, ushqyr attar jarysy boıynsha (2400 jáne 1800m) syıaqy qory – 63mln 600myń teńgeni (200 myń doll.) qurady. Ulttyq jarys túrleriniń syıaqy mólsheri – 36 mln teńge (115 myń doll.). Soma júldegerler arasynda 5-shi orynǵa deıin bólinip beriledi. Jeńimpazdar men júldegerlerdi saltanatty marapattaý jarys aıaqtalǵan soń júrgiziledi.
QR «Ulttyq sport túrleri qaýymdastyǵy» prezıdenti Bekbolat Qanaıulynyń sózinshe, 25 shaqyrymdyq alaman báıgege, 15 shaqyrymdyq top báıgege, 7 shaqyrymdyq qunan báıgege, 7 shaqyrymdyq jorǵa jarysqa ár oblystan bıylǵy jylǵy irikteý báıgelerinde júldeger bolǵan tańdaýly sáıgúlikter ǵana qatysady. Barlyǵy – 130-dan astam elimizdiń júırikteri tirkeldi.
Jarysqa elimizdiń 14 oblysy men Astana jáne Almaty qalalarynan shabandozdar qatysady, sondaı-aq, RF, Qyrǵyzstan, Tájikstan, Túrkıa, Bolgarıa men basqa da elderden qatysýshylar keledi dep kútilýde. Búgingi kúni ulttyq sport túrleri jastardyń arasynda úlken qyzyǵýshylyq týdyryp otyr. Eski dástúrler ásirese Almaty oblysynda jańǵyrtylyp jatyr. Oblysta qazirgi tańda 1384 dene shynyqtyrý kollektıvterinde ulttyq sportpen aınalysýshylar sany 46566 adamdy quraıdy. Onyń ishinde ulttyq at sporty túrlerimen 12582 adam shuǵyldanady,-dedi Almaty oblysy ákiminiń orynbasary Jaqsylyq Omar.
Jarystyń úzilis kezinde «djıgıtovka», «teńge ilý», «jamby atý», «qyz qýý», qazaqy tazy ıtter jarysy sıaqty ulttyq sport túrlerinen kórsetilimder uıymdastyrylady.
Aıta keteıik, QR Mádenıet jáne sport mınıstrligi «Ekspo-2017» halyqaralyq kórmesi aıasynda halyqaralyq deńgeıdegi 18 aýqymdy sporttyq shara uıymdastyrady. Elimizdiń óńirleri de sporttyq saıystardan qalys qalmaıdy. Halyqaralyq kórme aıasynda Qazaqstannyń 14 oblysynda 20-dan astam sporttyq saıystar ótkiziledi.
