QR Aqparat jáne komýnıkasıalar mınıstri Dáýren Abaev «100 jańa tulǵa»  jobasy boıynsha ótinim qabyldaý bastalǵany týraly habarlady.

«Qoǵamda «100 jańa tulǵa» jobasy qalaı júzege asyrylatyny qyzý talqyǵa túsip jatyr. Jumys tobynyń teń tóraǵasy retinde osy másele jóninde túsinik berip ótkim keledi. Biz úmitkerler tizimin jasaý úshin barlyq alańdar, quraldar men derekkózderdi paıdalanýǵa nıettimiz», - dep jazdy  óziniń Feısbýktaǵy paraqshasynda mınıstr.

El.kz ınternet-portaly bazasyndaǵy 100esim.el.kz saıtynda ótinim qabyldaý bastalǵan. Bireýlerdiń ómir joly, jetistigi sizge erekshe kórinse nemese siz ózińiz osyǵan laıyqty bolsańyz, onda sizdiń  jobaǵa qatysýǵa múmkindigińiz bar. Ol úshin 100esim.el.kz saıtyna kirip, ótinimdi toltyrý qajet.

Mınıstrlik budan basqa pikiri qoǵamnyń senimine ıe bolǵan sporttan  bastap ǵylymǵa deıingi ár saladaǵy eldiń sarapshylary, eńbek sińirgen qaıratkerlerimen belsendi jumys júrgizý josparlaǵan.