Pákistandyq Karachı qalasynyń 70 jastaǵy Ashrafýddın esimdi turǵyny óte sırek kezdesetin makrodaktılıa aýrýyna shaldyqqan. Sonyń saldarynan onyń qolynyń pishini ózgergen. Osyǵan baılanysty qarıany jumystan shyǵaryp jiberdi. Ashrafýddın otbasyn asyraý úshin kóshede qaıyr suraýǵa májbúr.

Makrodaktılıa – óte sırek kezdesetin gıgantızmniń bir túri. Ol ádette qolǵa shyǵady. Atalmysh aýrý túri kóp jaǵdaıda sındaktılıamen kezdesedi, ıaǵnı saýsaqtardyń birigýi. Bul aýrýǵa shaldyqqandardyń tek bir qoly nemese bir aıaǵy ǵana zaqymdanady.

Ashrafýddın úlken qolmen dúnıege kelgen. Jyldar óte kele jaǵdaı ýshyǵa tústi. Er adam Karachıdegi meıramhanada daıashy bolyp jumys istegen. Alaıda meıramhanaǵa kelgen qonaqtar ol alyp kelgen tamaqty jeýden bas tartqan. Basqa jumys taba almady.

Ashraftyń úsh balasy bar. Onyń eń kishisi 1,5 jasta. Qarıa zeınetaqy almaıdy eken. Osy ýaqytqa deıin jumys istegen jerlerinde uzaq turaqtamaǵan. Er adamnyń aıtýynsha onyń derti bilim alyp, bir mamandyqty ıgerýine mursha bermegen.

Medıkter eki qolyn da kesýdi usynǵan. Alaıda Ashraf operasıadan bas tartty.

«Adamdar meni jıi mazaqtaıdy. Kóbi jaı ǵana maǵan qaraǵanyna jıirkenip turady» deıdi er adam.  

Daıyndaǵan: Sabına Ramazan