Almatyda ótken Búkilálemdik Qysqy Ýnıversıadany ótkizý dıreksıasynyń basshysy Naıl Nurov Qazaq sport jáne týrızm akademıasynda mańyzdy sport sharasynyń ótý barysyn baıandap, qorytyndy shyǵardy.
Jıynda 28 qańtar men 5 aqpan aralyǵynda ótken Almatydaǵy Búkilálemdik stýdenttik oıyndarda Qazaqstan quramasy myqty kórsetkishke ıe bolǵandyǵyn aıtyp ótip, memleketimiz jalpykomandalyq esepte ekinshi oryndy ıelenip, 36 medaldi (11 altyn, 8 kúmis jáne 17 qola) qanjyǵasyna baılaǵanyn eske saldy. Qazaqstan quramasynyń qorjynyna Qazaq sport jáne týrızm akademıasynyń stýdentteri 7 altyn, 6 kúmis jáne 11 qola medal alyp kelgenin de tilge tıek etti.
Eske sala ketetin bolsaq, Almatyda ótken Ýnıversıada úlken sporttyq mura qaldyrdy. Shaharymyzda 2 úlken kópfýnksıonaldy sporttyq keshen 12 myń adamǵa arnalǵan «Almaty arena» jáne 3 myń adamǵa shaqtalyp «Halyq arena» salyndy. Onymen qosa sportshylarǵa arnalǵan atletıkalyq aýyl da turǵyzylǵan bolatyn. Oıyn aıaqtalǵannan keıin, Atletıkalyq aýyldaǵy úılerdiń 5 myńnan astam páterleri Almatyda úı alýǵa kezekte turǵan adamdardyń arasynda taratylyp berildi. Qazirgi tańda joǵaryda aıtylǵan sport kesheninde barlyq almatylyqtar men qala qonaqtarynyń sportpen aınalysýǵa múmkindikteri bar. Atap aıtar bolsaq, boks, mánerlep syrǵanaý, short-trek, kerlıng jáne túrli jekpe-jek túrlerimen shuǵyldana alady.
Jıynǵa jınalǵandardyń kóp bóligin qyzyqtyrǵan suraq – Qazaqstan jaqyn arada Qysqy Olımpıada oıyndaryn ótkizýge úmitti bola alady ma? Sóz sóıleý barysynda Nurov myrza bul suraqtyń anyq jaýabyn berdi. Almaty Olımpıada oıyndarynyń astanasy mártebesine tolyqtaı laıyq jáne sporttyq ınfraqurylymnyń damý kórsetkishi boıynsha oıynda ótkizýge daıyn ekenindigin aıtty.
Jıylǵan qaýymnyń aldynda Qazaq sport jáne týrızm akademıasynyń Prezıdenti, Qazaqstan Respýblıkasynyń stýdenttik sport federasıasynyń basshysy Qaırat Zakıránov sóz sóıledi. Ol Ýnıversıadany Almatyda ótkizý kezindegi birshama qıyndyqtardy, sonymen qatar elimizde ótken bul shara Ýnıversıada tarıhynda eń joǵarǵy deńgeıde uıymdastyrylǵan shara ekenin aıtyp ótti.
