Elorda basshylary «Ekspo» kórmesi kezinde sheteldik qonaqtardy qarsy alý barysynda taksı júrgizýshileri baǵany ózderi asyra kótergen jaǵdaıda tıisti sharalar qoldanady, dep habarlaıdy Qamshy aqparattyq agenttigi Astana qalasy ákimdiginiń medıa-ortalyǵyna silteme jasap.

Iaǵnı aram pıǵyl tanytqan taksı júrgizýshileri EKSPO qonaqtaryn tegin tasymaldaıdy.

Barlyq biryńǵaı taksı qyzmetterinde áýejaı men vokzaldan elorda nysandaryna deıingi aralyqta sapardyń shamamen baǵalanǵan quny kórsetiletin qazaq, orys jáne aǵylshyn tilderinde jazylǵan paraqshalar bolatynyn Astana qalasy ákiminiń orynbasary Malıka Bekturova medıa ortalyqqa habarlaǵan bolatyn.

- Jolaýshylarǵa nazaryna: eger siz biryńǵaı taksı qyzmetterimen taksometrdi qospaı jol júrseńiz, sizdiń sapar tegin bolatynyn aıtqym keledi» - deıdi M. Bekturova.

Sondaı-aq, ol taıaýda oryn alǵan vengr azamatyn Astananyń oń jaǵalaýyna deıin 40 myń teńgege jetkizgen taksı júrgizýshisiniń oqıǵasyna qatysty pikir bildirdi.

-Birinshiden, ol taksometri bola tura, ony qospaǵan. Ekinshiden, týrıs barǵysy kelgen baǵyttyń sapar baǵasy taksı qyzmetiniń nusqaýlyǵynda kórsetilgen. Sáıkesinshe, taksıst sapar qunyn ádeıi kótergen. Kólik júrgizýshisi óz kinásin tolyq moıyndap jáne óteýin tólep, ókingendikten biz ony jaýapkershilikke tartqan joqpyz. Alaıda bul jaǵdaı oǵan jáne onyń áriptesterine sabaq bolady degen oıdamyn», - dep Bekturova óz sózin jalǵastyrdy.

Sheteldikten qomaqty qarajat alǵan júrgizýshi biryńǵaı taksı qyzmetine jaqynda jumysqa ornalasqany belgili boldy.

-Buryn ol jeke taksı júrgizýshisi bolǵan, keıin zańdastyrylǵysy kelgen. Alaıda, aýrý qalsa da, ádetteri áli qalmaǵan eken, - dep ázildedi Bekturova.

EKSPO – 2017 halyqaralyq mamandandyrylǵan kórmesi Astanada óz jumysyn 10 maýsymnan bastaıdy.