2017 jyldyń eń aıtýly oqıǵalardyń biri EKSPO Halyqaralyq kórmesi. Kórmeniń memleket úshin de, Qazaqstan turǵyndary úshin de mańyzy zor. Búgin, ıaǵnı 9 maýsym kúni Halyqaralyq kórmeniń ashylý saltanaty ótetini habarlanǵan bolatyn. Qamshy aqparattyq agenttigi Informburo.kz-ke silteme jasap EKSPO kórmesiniń bastalýyna 24 saǵat qalǵandaǵy Astananyń tirshiligin nazarlaryńyzǵa usynady.
Qazaqstan Respýblıkasynyń Memleket basshysy, SHYU-na múshe memleketterdiń basshylary búgingi saltanatty jıynnyń aıtýly qonaqtary , pavılondy aralaǵan alǵashqy saıahatshylar bolmaq. Syıly qonaqtarǵa gıd bolyp Elbasynyń ózi júredi dep kútilýde.
Aıtýly oqıǵanyń ashylý saltanatyn tikeleı efır men telearnalardan elimizdiń barlyq turǵyndary tamashalaı alady. Alaıda kórmeni tamashalaýǵa 10 maýsymnan bastap ruqsat etilgen.
Qala ishi men kórme mańy erekshe rejimdegi kúzetpen qorǵalýda. Polısıa qyzmetkerleri men Ulttyq ulan sarbazdarynyń qarasy kóbeıýde. 
Aldaǵy 90 kún ishinde eń myqty qorǵanysta bolatyn da osy kórme bolý kerek.
Boljam boıynsha aldaǵy 3 aıda qarapaıym kıim kıgen qyzmetkerler de tynyshtyqty kúzetpek. Aldyn ala jasalǵan daıyndyq boıynsha basty nazar antıterrorızmmen kúres. Kúzet kezekshiligine túsken arnaıy daıarlanǵan ıtterdiń de sany artyp, qarýly kúzet te kórmege kelýshilerdiń tynyshtyǵyn kúzetpek.
Arnaıy álemdik kórme qarsańynda polısıa qyzmetkerleri jazdyq jańa kıim úlgisine kóshti. Arnaıy jeletke Japonıa men Ońtústik Koreıanyń quqyq qorǵaýshylarynyń kıimine uqsas bolǵanyna qaramastan ádemi kórinedi.
Quqyq qorǵaýshylar EKSPO kórmesi resmı túrde ashylǵannan keıingi birneshe kún boıynda qatań tekserister júrgizbek. Eshqandaı oqys jaǵdaıǵa jol bermes úshin tyrysyp baǵatyndary anyq.
Kógaldandyrý isine keler bolsaq, qala ishi birshama aqsap tur. Uıymdastyrýshylar «Bolashaqtyń energıasyn» qalyptastyrý barysynda qaladaǵy kóshelerdiń mańy jasyl jelekke aınalatynyn málimdegen bolatyn. EKSPO-ǵa arnaıy jasalǵan vıdeorolıkte de jan-jaǵymyz jasyl túske boıalyp tur. Al shyn máninde qandaı?
Birneshe gektar jerge kóz júgirtseń vıdeorolıktegi kógal men qalanyń ishindegi gúlzardyń birshama aıyrmashylyǵy baıqalady.
Aımaqty kógaldandyrýǵa gıdrokóterimniń de esh paıdasy tımegen. Sebilgen dán qurǵaq topyraqqa túsip, qýrap ketken.
Aımaqtyń kógaldandyrýyna jaýapty ortalyq ákelgen arnaıy shóptiń túpteriniń ózi qýrap ketken. Japan dalaǵa uqsap qalyp ketken gúlzar ishindegi qurǵaq jer qurylystan keıingi qoqysty jasyrýǵa shamasy jetpeı tur.
Sýlandyrýǵa arnalǵan qurylǵylar jaqynda ǵana ornatylǵan. Soǵan qaramastan isten shyqqan. Onyń sebebi, asyǵys istelgen is barysynda kópshilik biletin erejelerdiń saqtalmaýy.
EKSPO kórmesinde sement, áınek, shyny men asfált kóp. Alaıda jasyl shóp ara-arasynda qarasyn kórsetedi. Astanaǵa kelgen qonaqtar jasyl aımaqty kórgisi kelse ortalyq saıabaqtarǵa barǵany jón.
Qala ishindegi shaǵyn baqtar men saıabaqtar saıahatshylardy qabyldaýǵa tolyqtaı daıyn.
«Abý-dabı Plaza» ǵımaratynan kórmege deıingi jolǵa jospar boıynsha taǵy bir saıabaq salý kerek bolǵan. Alaıda belgisiz sebeptermen saıabaqtyń qurylysy bastalmady. Qurylysshylar áreń degende Túrkistan men Aqmeshit kóshelerindegi qurylys jumystaryn aıaqtady. Onyń sebebi Qazaqstannyń «Shar» pavılonyna aparatyn joldy jalǵap turǵan osy eki kóshe . Kósheler jóndeýden ótip, kórki kirip qalǵany ras. Alaıda kóshedegi qurylystyń qaldyqtary kópshiliktiń nazaryn ózine aýdaryp-aq tur.
EKSPO-ǵa daıyndyq barysynda bıik qabatty ǵımarattardyń aıaqtalmaǵany sheteldik qonaqtardy tańqaldyrýy ábden múmkin. Kelisim shart boıynsha 10 maýsymǵa deıin turǵyn úılerdiń qurylysyn aıaqtap, ótkizý kerek bolǵandardyń qatarynda tanymal brendter de bar.
«Abý-Dabı Plaza» kórmeniń ashylýynan buryn qurylysyn aıaqtamaǵan eń aıtýly ǵımarattardyń biri.
Jyl jańalyǵy bolyp otyrǵan kórme qarsańynda aıaqtalmaǵan qurylys, qoqystar astanalyqtardy birshama qynjyltýda. Aıaqtalmaǵan qurylys pen qurylys qaldyqtary tipti Astananyń eń aıtýly «Máńgilik El» jobasynyń mańynda da jatyr.
Eger 24 saǵat ishinde kóshelerdiń bári retke keltirilmese EKSPO mańyndaǵy qurylystyń sýretteri jelini shýlatýy múmkin.
Aýdarǵan: Aıgerim TAÝBAI
