54 jastaǵy Djessı Tendaıı Oýk-Loýn qalasynyń mańyndaǵy balalar aýrýhanasynyń kafesinde jumys istegen. Ár jyl saıyn aýrýhanadaǵy balalar úshin erekshe dúnıeler ázirlep júrdi, ár merekelerin kóterińki kóńil kúıde ótkizýlerine sebepker boldy. Al bul jyly balalar úshin kútpegen tosyn syı jasady.
Osy jylǵa deıin áıel adam aqshasyn únemdep, balalarǵa oıynshyq áperý úshin 5000 dollardaı jınaǵan. Onyń ústine, álgi oıynshyqtardy ózi satyp alǵan.
«Balalardy baqytty etý úshin qolymnan kelgeniniń bárin isteýim kerek edi», dedi Djessı.
Ótken jyldyń 12 jeltoqsanynda Tendaıı oıynshyqtardy balalar aýrýhanasyna, sondaı-aq park Rıdjdegi lúterandyq gospıtálǵa aparyp berdi.
Jergilikti BAQ-tyń málimetinshe, áıel adam osyǵan uqsas tosyn syılardy 2009 jyldan beri jasap kelgen kórinedi.
Alǵashqy jyly Rojdestvodan balaqaılarǵa arnap 100 syılyq aldy. Jyl saıyn syılyq sanyn ósirip otyramyn dep ózine ýáde etti. Al 2017-de 1300 syılyqqa deıin jetkizdi.
«Meniń muny nege istep júrgenim qyzyqtyratyn shyǵar. Júregime meıirimdilikti qudaıdyń ózi saldy. Birde teledıdar qarap otyryp, ózgeniń kómegine, qamqorlyǵyna muqtaj balalardy kórdim. Álemdi aıtpaǵanda, ózimniń memleketimde qanshama bala kómekke muqtaj ekenin bile tura, men alańsyz uıyqtaı almas edim. Sóıtip, aqsha jınaýdy sol kúnnen-aq bastap kettim», - dedi Djesı tilshilerge bergen suhbatynda.
Tendaıı 19 jyl boıy Chıkagoda kúıeýimen ómir súrip keledi. Alaıda, olardyń balalary bolmaǵan. Al 18 jyl burny balalar aýrýhanasynyń kafesine jumysqa ornalasty.
«Másele baılyqta ne aqshada emes. Men tek balalardyń baqyty úshin bárine daıynmyn. Olarǵa qamqor bolatyn adam mindetti túrde bolýy tıis. Jáne sol adam men ekenimdi júregim sezdi. Men baqytttymyn. Qýanyshtan júzderine kúlki úıirilgen balaqaılardy kórgende, baqytym ulǵaıa túsedi. Balalar úshin ómirimniń sońyna deıin qaıyrymdylyqpen aınalysýǵa daıynmyn».
Sholýshy: Gúlim Jaqan
