12 maýsym kúni Family Village kotej qalashyǵynda Qazan handyǵynyń hanshaıymy Súıinbıke atyndaǵy jańa kóshe ashyldy, dep jazady Qamshy aqparattyq agenttigi. Saltanatty sharaǵa qala ákimi Áset Isekeshev pen Tatarstan Respýblıkasynyń Prezıdenti Rýstam Mınnıhanov qatysty. Bul jaıynda qala ákimdiginiń resmı saıty habarlaıdy.
– Byltyrǵy jyldyń qazan aıynda biz Astanada Tatarstan ýákildiginiń mekemesin saltanatty túrde ashqan bolatynbyz, al búgin hanshaıym Súıinbıke atyndaǵy kóshe ashylyp jatyr. Bul – ortaq tarıhı tamyrdyń tereńdigi men halyqtar arasyndaǵy berik dostyqtyń nyshany dep sanaımyn. Elorda turǵyndaryn jáne tatar seriktesterin búgingi mańyzdy oqıǵamen quttyqtaımyn, - dedi Astana qalasynyń ákimi Áset Isekeshev.
Hanshaıym Súıinbıke kóshesi – osymen Elordada tatar halqynyń ókilderine berilgen ekinshi kóshe. «Saryarqa» aýdanynda Keńes odaǵynyń batyry, tatar aqyny, Musa Jálel atyndaǵy kóshe bar.
- Biz búgin burynǵydan da jaqyndaı tústik. Biz aǵaıyndy halyqpyz, bul kósheniń ashylýy – asa mańyzdy ári tarıhı oqıǵa. Bizdiń astanamyzda Nursultan Nazarbaev atyndaǵy tamasha kóshe bar. Osyndaı qadamdar bizdi jaqyndastyra túseri sózsiz. Qazaqstan Prezıdentine, Astana qalasynyń ákimi Áset Isekeshevke jáne hanshaıym Súıinbıke atyndaǵy kósheniń ashylýyna sheshim qabyldaǵan barlyq tulǵalarǵa alǵysymyz sheksiz. Dostyǵymyzdy nyǵaıtatyn osyndaı múmkindikterdiń bolǵanyna qýanyshtymyn. Barlyq qazaqstandyqtardy EKSPO kórmesiniń ashylýymen quttyqtaımyn jáne álemdik deńgeıdegi sharanyń laıyqty ótýine tilektespin, - dedi Tatarstan Respýblıkasynyń Prezıdenti Rýstam Mınnıhanov.
Hanshaıym Súıinbıke atyndaǵy kósheniń ashylýyna halyqaralyq «Alash» ádebı syılyǵynyń ıegeri, eńbek sińirgen mádenıet qaıratkeri, Qazaqstan jazýshylar odaǵynyń múshesi Sharban Beısenova, aqyn, fılologıa ǵylymdarynyń doktory Janat Áskerbekkyzy muryndyq boldy. Hanshaıymnyń músinin Qazaqstan Respýblıkasynyń eńbek sińirgen qaıratkeri, Tatarstan Respýblıkasynyń halyq sýretshisi, Qazaqstan men Tatarstannyń memlekettik syılyqtarynyń laýreaty, Reseı jáne Qytaı Halyq Respýblıkasynyń sýretshiler akademıasynyń qurmetti múshesi Kámil Mýllashev daıyndady.
