Ramazan aıynda aqtóbelik kásipker Shamıl Kaspranov balalar úıiniń tárbıelenýshisi Irına Kýdrınaǵa páter syılady, dep jazady Qamshy aqparattyq agenttigi. Jalǵyzbasty ananyń endigi armany eldiń úmitin aqtap, kásipkerdiń senimine qaıaý túsirmeý. Bul jaıynda QazAqparat habarlaıdy.
Irına Kýdrına 5 jasynda «Alǵa» balalar úıine túsip, sol jerde qazaq tilinde bilim alǵan. 1996 jyly endi-endi es jıǵan kishkentaı qyz ózimen taǵdyrlas balalarmen qatar tárbıelendi, ómir úshin kúresti. Alǵashynda balalar úıi degen ataýǵa úırenisip, oń-solyn tanydy. Ol ata-anasy týraly múlde bilmeıdi.
«Balalar úıinde daıyndyq sabaǵyna bardym. Sol kezde menen «Qazaq tilindi oqyǵyń kele me?» dep surady. Oılanbastan birden kelisimimdi berdim. Qazir qazaq jáne orys tilinde erkin sóıleımin. Mektepte, joǵarǵy oqý ornynda qazaq tilinde bilim aldym. «Alǵa» balalar úıinen soń Qudaıbergen Jubanov atyndaǵy Aqtóbe óńirlik memlekettik ýnıversıtetiniń tarıh fakúltetinde oqydym»,- dedi Irına Kýdrına.
Ol úsh jastaǵy balasyn jalǵyz ózi tárbıelep júr. Jalǵyzbasty ana 7 jyldan beri páter kezeginde turady. Qazirgi ýaqytta qalalyq turǵyn úı sektorynda 300 adam bolyp tur.
«Alǵa» balalar úıiniń dırektory Kenjeǵazy Baıǵazınge, Jasóspirimder úıiniń dırektory Janna Dúısenbınaǵa alǵys aıtamyn. Ol adamdar bizdi tárbıeledi, qıyn kezde aqyl-keńesterin berdi, janymyzǵa jubanysh boldy. Aqylshylarymyz bolmaǵanda biz qaıda baryp, kimnen pana surar edik? Qazir balam úsh jasta. Endigi armanym ulymdy el azamaty etip tárbıelep, kásipkerdiń úmitin aqtaý, jumys isteý. Kásipker Shamıl Kaspranovty tanymaıtyn edim. Páterdi syıǵa beretin kúni balalar úıiniń tárbıelenýshilerin túgel shaqyryp, «Meıirim» áleýmettik úıi ashyldy. Sol kezde meni atyp shaqyryp, kilt bergende qýanyshymda shek bolmady. Ol jumysqa alýǵa ýáde berdi. Sol adamnyń senimin aqtap, jaqsy jumys isteýge ýáde beremin»,- dedi I.Kýdrına.
Aıta keteıik, Irına sońǵy 7 jyldan beri páter jaldap turady. Joǵarǵy oqý ornyn bitirgen soń ol tárbıeshi, satýshy bolyp jumys istegen. Turaqty tabysy joq jalǵyzbasty ana ózin jazǵyryp, aýyr sózder aıtyp, ómirine kúdikpen qaraıtyndardan kóńili qalǵan.
«Men týraly túrli oı aıtyp, páter alǵanym úshin jazǵyryp, urysyp jatyr. Biraq olar jetim bolýdyń, ata-anasyz ómir súrýdiń, ár kúni kúresýdiń, moıymaı alǵa umtylýdyń ne ekenin bilmeıtin adamdar dep oılaımyn. Meni eshkim kinálap, jazǵyrmasa eken. Shamıl Kaspranov eki adamdy baspanaly etti. Men jáne meniń balam baqyttymyz»,- dedi ol.
Qazaq tilin jetik meńgergen Irına Kýdrına jeńil atletıkamen shuǵyldanǵan eken. Jasóspirimder úıiniń dırektory Janna Dúısenbına adamdarmen emin-erkin sóılesip, jaqsylyq jasaýǵa daıyn turatyn Irınanyń aldaǵy ýaqytta eli úshin aıanbaı eńbektenetinine senedi.
