Nursultan Nazarbaev Qazaqstanǵa resmı saparmen kelgen Grýzıa Prezıdenti Georgıı Margvelashvılımen kezdesti, dep habarlaıdy Qamshy aqparattyq agenttiginiń tilshisi.

Memleket basshysy Grýzıa Prezıdentiniń sapary aıtýly oqıǵalarǵa – elderimiz arasyndaǵy dıplomatıalyq qatynastardyń 25 jyldyǵyna jáne «EKSPO-2017» halyqaralyq kórmesiniń ashylýyna tuspa tus kelip otyrǵanyn atap ótti. 

– Sizdiń osy saparyńyzǵa jáne Grýzıanyń kórmege qatysqanyna dán rızamyz. Bizdiń qarym-qatynastarymyz árkezde de jaqsy boldy. Elderimiz táýelsizdiktiń alǵashqy jyldarynda bir-birine jan-jaqty kómek kórseti. Qazaqstan Grýzıa ekonomıkasynyń negizgi ınvestorlarynyń birine aınaldy. Ekijaqty qatynastardy odan ári jaqsartýǵa eshqandaı da kedergi joq. Bul turǵyda Sizdiń saparyńyzdyń mańyzy zor, – dedi Nursultan Nazarbaev.

Grýzıa Prezıdenti elimizdiń damý qarqynyna qyzyǵýshylyq tanytyp, Qazaqstanǵa kelýge kópten yqylasty bolǵanyn aıtty.  

– Sizdiń jáne halqyńyzdyń qıyndyqqa toly osy jyldarda aýqymdy jumys atqarǵandaryńyzdy qazir óz kózimmen kórip otyrmyn. Grýzın halqy Sizdiń elińiz ben jeke ózińiz tarapynan kórsetilip jatqan qoldaýǵa rızashylyq bildiredi jáne ony baǵalaı biledi. Grýzıanyń «EKSPO-2017» kórmesine qatysýy asa mańyzdy dep sanaımyn. Biz onda óz ekonomıkamyzdyń jetistikterin kórsetip, dástúrli tatý kórshilik baılanystarymyzdy jalǵastyra alamyz, – dedi G.Margvelashvılı.

Sondaı-aq Grýzıa Prezıdenti ekonomıkalar yntymaqtastyǵynyń tujyrymdamasyna óz eliniń belsene qatysyp, halyqtar arasyndaǵy dıalogty damytýǵa jaǵdaı jasap otyrǵanyn atap ótti.

– Sizdiń osy baǵytta orasan zor jumys atqaryp júrgenińizdi bilemin. Bizdiń elderimiz táýelsizdikke qol jetkizgen sátten beri dál osy baǵytta damyp keledi, – dedi G.Margvelashvılı.

Sońynda Grýzıa Prezıdenti Nursultan Nazarbaevqa uzaq jyldardan bergi qoldaýy úshin zor alǵys bildirip, Astanadan alǵan áserleri jóninde aıtty.