Májilis tóraǵasy Nurlan Nyǵmatýlın Eýrazıa elderi parlamentteri spıkerleriniń ekinshi jınalysyna qatysý barysynda birqatar parlamentter tóraǵalarymen ekijaqty kezdesýler ótkizdi, dep jazady Qamshy aqparattyq agenttigi.

«Eýrazıa aımaǵynda ortaq múddeler aıasynda parlamentaralyq yntymaqtastyqqa yqpal etý» taqyrybynda ótip jatqan forým barysynda alǵashqy júzdesý Koreıa Respýblıkasynyń Ulttyq Assambleıasynda ótti.

Májilis tóraǵasy Chýng Se Gúnmen parlamentaralyq únqatysýdy odan ári yntalandyrýdyń ózekti suraqtaryn talqylady. Qazaqstan men Koreıa arasyndaǵy strategıalyq áriptestikke basa nazar aýdarǵan N. Nyǵmatýlın EAEO úlken múmkindikterge jol ashatynyn atap ótti. Chýng Se Gún óz kezeginde bizdiń elimizben yqpaldastyqty tereńdetýge daıyn ekendikterin jetkizdi.

Al, Reseı Memlekettik Dýmasy tóraǵasy Vácheslav Volodınmen júzdesýde ıntegrasıalyq birlestikter aıasynda yntymaqtastyqty odan ári nyǵaıtý suraqtary talqylandy. Taraptar atap ótkendeı, Qazaqstan men Reseı basshylarynyń ózara belsendi is-qımyly qos memleket arasynda ornaǵan berik dostyq ári strategıalyq qarym-qatynastyń jarqyn kórinisi.

Sondaı-aq, Qazaqstan men Armenıa parlamentteri arasyndaǵy baılanysty damytýǵa dostyq toby barynsha yqpal etetin bolady. Onyń quramy taıaý ýaqytta Armenıanyń Ulttyq jınalysynda bekitiledi. Bul týraly Ulttyq jınalys tóraǵasy Ara Babloıan májilis tóraǵasy N. Nyǵmatýlınmen kezdesý barysynda málimdedi. Odan ári eki eldegi saıası ózgerister tóńireginde áńgime órbidi.

Armenıa parlamenti ókilderi Qazaqstan Prezıdenti usynǵan konstıtýsıalyq reforma qazaqstandyq qoǵamdy odan ári demokratıalandyrý jolyndaǵy kezekti mańyzdy qadam ekenin atap ótti.

A.Babloıan Astanada ótip jatqan EKSPO kórmesine joǵary baǵa berdi.