Almaty oblysynyń Jambyl aýdany Aqseńgir aýyldyq okrýgine qarasty Jaısań aýylyndaǵy jer daýy jınalysyna jıylǵan turǵyndar. 26 maýsym 2017 jyl, dep jazady Qamshy aqparattyq agenttigi Azattyq radıosyna silteme jasap.
Almaty oblysynyń Jambyl aýdany Aqseńgir aýyldyq okrýgine qarasty Jaısań aýylynda jer daýynan tóbeles shyqty. Talasqa túsken jer – aýyl irgesindegi «jaıylym». Jerdi jalǵa alǵan - kásipker, «maldy qaıda jaıamyz?» dep narazy bolǵandar – 50-den astam oralman. Kásipker ókili jerdi «jalǵa alǵandaryn» aıtady, ákimdik ony rastaıdy. Al oralmandar ákimdik bergen jaıylym «aýyldan alys jáne ol jerde sý joq» deıdi.
Turǵyndar talasqa túsken jerdiń Jaısań aýylynyń batys irgesinen bastalatynyn aıtady. Jerdi jalǵa alǵan «TOO Medeý-Komers» mekemesi málimetterine qaraǵanda, jerdiń kólemi - 300 gektar.
«MALDY QAIDA JAIaMYZ?»
Jaısańda narazy turǵyndar aýyl ortasyna jınaldy. Jıylǵan 50-den astam oralmannyń pikirinshe, «mal jaıatyn jerlerin jeke kásipker zańsyz paıdalanyp jatyr».
Almaty oblysy Jambyl aýdany Jaısań aýylyndaǵy shóp tıegen kólik. 26 maýsym 2017 jyl.
Turǵyndar sózine qaraǵanda, aýyl irgesinen bastalatyn dalany olar «jaıylym retinde paıdalanyp kelgen». Biraq tórt jyl buryn bul jerge talas bastalyp, bıyl ol jerdi jalǵa alǵan qojalyq jyrtyp tastaǵan. Turǵyndar «jerdiń endi mal jaıýǵa kelmeı qalǵanyn» aıtady.
Joǵarydaǵylardyń aıtýynsha, aýyl mańyndaǵy jerdi jalǵa berýge, satýǵa bolmaıdy. Kóktemde ótken jınalysta [kásipkerge] budan basqa jerdi beremiz degen. Endi mine 100 metr ǵana tastap qoıyp otyr.
Oralmandardyń sózinshe, «jerdiń áleginen buǵan deıin de birneshe jınalys ótken, solardyń birinde aýyl ákimi Erjan Qosymshalov jerdi jalǵa alǵan kásipkerden egistikti aýyldan «sál ári» salýdy suraǵan». Kásipkerdiń oǵan qulaq aspaǵany kórinip tur, jalǵa alýshy jerdi keı turǵyndardyń ájethanasynyń túbinen bastap jyrtqan. Jaısańǵa Qytaıdan 2006 jyly kóship kelgenin aıtqan turǵyn Qasenhan Uzaq:
- Joǵarydaǵylardyń aıtýynsha, aýyl mańyndaǵy jerdi jalǵa berýge, satýǵa bolmaıdy. Kóktemde ótken jınalysta [kásipkerge] budan basqa jerdi beremiz degen. Endi mine [bizge] 100 metr ǵana tastap qoıyp otyr. Bárimiz birdi-ekili malmen kún kórip otyrmyz. Al, jaıylymnyń túri mynaý, - deıdi aýyl shetin kórsetip.
Almaty oblysynyń Jambyl aýdany Aqseńgir aýyldyq okrýgine qarasty Jaısań aýylyndaǵy daýy jerdi jyrtyp júrgen tehnıka. 26 maýsym 2017 jyl.
Aýyl turǵyndary jerdi jalǵa alýshylardyń «egistik jerge mal kirip ketse, ony qamap qoıyp, aıyppul tólegen soń ǵana, qaıtaratynyn» aıtyp shýlasty.
Al ózin jerdi jalǵa alǵan «Medeý-Komers» JSHS-iniń bas mamany retinde tanystyrǵan Arystanbek Taǵaev jerdiń memlekettik aktisin kórsetip:
- Aýylǵa jaqynda ferma salynady. Soǵan baılanysty bul jerde mal azyǵyn daıyndap jatyrmyz. Jer memlekettik baǵdarlamamen 49 jylǵa jalǵa alynǵan. Al egistikke túsken maldy qamap qoıý týraly zań bıyl shyqty, - dedi.
Alaıda turǵyndar kásipker ókili kórsetken «qujattardyń zańdylyǵyna kúmán keltiretinderin», «jer ıeleriniń ótken jyly da biraz maldy qamaǵanyn, qaıtarý úshin 40 000 teńge suraǵandaryn» aıtyp, daýryǵysyp ketti.
«JAIYLYMDYQ JER BÓLİNGEN»
Al jınalysqa kelgen aýyl ákimi Erjan Qosymshalovtyń sózinshe, «turǵyndarǵa jaıylymdyq jer bólinip berilgen, mal jaıatyn jerge qatysty eshqandaı problema joq».
- Kásipkerdiń jalǵa alyp otyrǵan jeri áý bastan egistikke arnalǵan, - dedi ol.
Alaıda onyń bul sózin estip turǵan turǵyndar «jaıylymǵa bólingen jerdiń aýyldan tym alysta jáne onda sý joq ekenin» aıtyp shýlasty. Turǵyndar málimetine qaraǵanda, jaıylym dep ákimdik bergen jer «aýyldan 5-6 kılometr qashyqta jatyr».
Jaıylymǵa jer bólingenin aıtqan aýyl ákimi Qosymshalov jıynǵa tilshilerdiń kelgenin kórip, turǵyndarǵa "Jýrnalıserdi nege shaqyrdyńdar?" dep keıip, tez ketip qaldy. Odan keıin «Medeý-Komers» JSHS ókilderi de qaıtýǵa beıimdeldi. Alaıda osy kezde daýly jerdi kúzetetin qaraýyl men aýyl turǵyndary arasynda ereges shyǵyp, bir-birine qol siltesken eki adamdy arashalaǵan jurt shań-shuń boldy da qaldy. Álgi eki adamdy ajyratqannan keıin turǵyndar «endi jer daýyna qatysty shaǵymdaryn sotqa beretinderin, bıliktegi «Nur Otan» partıasy men aýdandyq ákimdikke aryz túsiretinderin» aıtyp tarasty.
Almaty oblysynyń Jambyl aýdany Aqseńgir aýyldyq okrýgine qarasty Jaısań aýylyndaǵy jer daýy kezinde eregesip qalǵan turǵyndar. 26 maýsym 2017 jyl.
Almaty qalasynan 70-80 kılometrdeı jerdegi Jaısań aýylynda shamamen 400-deı tútin bar. Sonyń júz shaqty otbasy - oralmandar. Turǵyndar orta eseppen «ár úıde irili-usaqty keminde 20 bas mal baryn» aıtady. Aýyl azamattary «mal baǵýdan ózge, kúndelikti nápaqalaryn Uzynaǵashta qara jumys istep tabatyndaryn» baıandady.
Bul Almaty oblysy Jambyl aýdany Aqseńgir aýyldyq okrýginde birinshi ret shyǵyp turǵan jaıylym daýy emes. 2016 jyly Kókdala aýylynyń bir top turǵyny Azattyqqa jaıylym jerdiń daýyn aıtyp habarlasqan. Ol joly da jerge talas kásipker men turǵyndar arasynda shyqqan edi.
