Búgin QR Parlamenti Senatynyń 16 depýtatyn saılaý ótedi, dep habarlaıdy QazAqparat. «Astana ýaqyty boıynsha saǵat 9-00-degi jaǵdaıǵa sáıkes barlyq 16 pýnkt daýys berý úshin tolyqtaı jaraqtandyrylǵan jáne jumys isteýge daıyn.  Tańdaýshylardyń elektrondy tirkelýi bastaldy. Ol 10-00-ge deıin jalǵasady jáne tańdaýshylardyń jınalysy Astana ýaqytymen týra saǵat 10-00-de bastalady. Dál qazirgi ýaqytta election.gov.kz saıtynan onlaın rejimde tańdaýshylardyń tirkelýine baqylaı alasyzdar. Elimizdiń 16 óńirinen 16 Senat depýtaty saılanady», - dedi QR Ortalyq saılaý komısıasynyń múshesi Konstantın Petrov.  Buǵan deıingi túpkilikti derekterge sáıkes, elimizdiń zań shyǵarýshy organynyń joǵarǵy palatasynyń 16 mandatyna oblystardan, Astana men Almaty qalalarynan 38 úmitker tirkelgen. Saılaýǵa qatysatyn tańdaýshylardyń sany - 3293. Senat saılaýyn 288 halyqaralyq baıqaýshy qadaǵalaıdy.

Tańdaýshylardyń sany boıynsha basym aımaqtardyń qatarynda Almaty (333), Shyǵys Qazaqstan (318) jáne Ońtústik Qazaqstan oblystary (312) bar. Al Astana (25) men Almaty (36) qalalarynda tańdaýshylar sany tómen. Qazirgi ýaqytta daýys berý búlletenine 5 óńirde 3 kandıdattan, 11 óńirde 2  kandıdattan tirkelgen. Tańdaýshylar - máslıhat depýtattary búleten alý arqyly qaǵaz túrinde daýys beredi. Daýys berýdi uıymdastyrý jáne daýystardy engizýde aıtarlyqtaı jańalyq joq. Ortalyq saılaý komısıasynyń nátıjesi barlyq 16 óńirlik komısıadan hattamalar jınalǵannan keıin shyǵarylady. «Konstıtýsıalyq zańnamaǵa sáıkes nátıjeni shyǵarý úshin bizge 7 kún ýaqyt berilgen. Menińshe, nátıjelerdi jınaǵannan keıin 7 kúndi kútpesten daıyn bolýyna qaraı erteń ne arǵy kúni jarıa etip qalarmyz», - dedi Konstantın Petrov Aıta keterligi, Senattyń 47 depýtaty bar. Onyń 15-in Prezıdent taǵaıyndaıdy. Al qalǵan 32-si ár 3 jyl saıyn ár óńirden ekiden saılanady.