Memleket basshysy Jazýshylar odaǵyn 80 jyldyq mereıtoıymen quttyqtady. Bul týraly akorda.kz habarlady.

Elbasy óz quttyqtaýynda Jazýshylar odaǵyn 700-den astam qazaqstandyq aqyn-jazýshynyń basyn qosqan elimizdegi eń alǵashqy jáne eń iri shyǵarmashylyq birlestikterdiń biri ekenin atap ótti.

«Bul – elimizdiń mádenı ómiriniń damýyna, moraldyq jáne rýhanı qundylyqtardyń nyǵaıa túsýine, jastar tárbıesine zor úles qosyp otyrǵan irgeli ujym. Jazýshylardyń búgingi býyny – Qazaqstan ádebıetiniń keshegi Abaı Qunanbaev, Jambyl Jabaev, Shákárim Qudaıberdıev, Muhtar Áýezov, Sáken Seıfýllın, İlıas Jansúgirov, Ǵabıt Músirepov, Morıs Sımashko, Ivan Shegolıhın syndy kóptegen kórnekti tulǵalarynyń baǵa jetpes muralaryn laıyqty jalǵastyrýshy izbasarlary», – delingen quttyqtaýda.

Qazaqstan Prezıdenti sondaı-aq memleketimiz Táýelsizdiktiń alǵashqy kúnderinen jazýshylarǵa qoldaý bildirip, qoǵamdaǵy shyǵarmashylyq orta men jasampazdyq rýhty qalyptastyrýǵa udaıy qamqorlyq jasap kele jatqandyǵyna toqtalyp ótti.

«Ádebıet salasyndaǵy Memlekettik syılyq bar, jas talanttarǵa Memlekettik «Daryn» jastar syılyǵy beriledi. Jyl saıyn qalamgerlerge Prezıdenttik jáne Memlekettik stıpendıalar tapsyrylady. Memlekettik tapsyrys aıasynda qazaqstandyq úzdik avtorlardyń júzdegen kitaptaryn shyǵarý ıgi úrdiske aınalǵan», – dedi Nursultan Nazarbaev.

Memleket basshysy rýhanı kemeldený, jalpyulttyq qundylyqtardy damytyp, beıbitshilik pen kelisimniń asyl murattaryn ulyqtaý  – «Qazaqstan-2050» Strategıasynyń basty mindetteriniń biri ekenine nazar aýdardy. Bul oraıda, jańa qazaqstandyq patrıotızmdi qalyptastyrýǵa belsene aralasatyn zıaly qaýym osy mindetterdi oryndaýda sheshýshi rólge ıe bolýy tıis.

Sońynda Qazaqstan Prezıdenti Jazýshylar odaǵynyń aldaǵy ýaqytta da zıalylarymyzdy uıystyra beretinine senim bildirip, onyń múshelerine zor densaýlyq, bereke-birlik, shyǵarmashylyq tabystar jáne súbeli týyndylardy ómirge ákelýlerin tiledi.

Aıdar Órisbaev.

Derek: akorda.kz.

Sýret: livejournal.com.