Muhtar Ábilázovty elimizge Reseıden nemese Ýkraınadan ekstradısıalaý boıynsha Bas prokýratýra qandaı da bir kelissóz júrgizip jatqan joq jáne júrgizgen de emes. Bul týraly quzyrly vedomstvonyń baspasóz qyzmeti habarlady. Onda Bas prokýratýra ókilderiniń halyqaralyq quqyqtyq yntymaqtastyq prınsıpterine súıenetindigin málimdegen. Taralǵan aqparatta sondaı-aq, «Qazaqstannyń Bas prokýratýrasy joldaǵan suratýynyń fransýz sotynda qaralýyn qadaǵalaıdy jáne Ábilázovtyń uıymdasqan qylmystyq tobynyń izine túsýin toqtatpaıdy», delingen. Sondyqtan, fransýz bıliginen eks-bankırge qatysty Qazaqstan tarapynan qozǵalǵan qylmystyq isterdi de eskerýin suraıdy. Aıta keteıik, búginde Qazaqstan tarapy joldaǵan suratý Fransıanyń ádilet mınıstrliginde qaralyp jatyr. Eske salsaq, Reseı men Ýkraınadan túsken suratýlardy 24 qazanda qaraǵan Fransıa soty Ábilázovty Reseıge ekstradısıalaý týraly sheshim shyǵarǵan bolatyn.