Birde jumystan sharshap kelgen ákesiniń aldynan úıindegi 5 jasar balasy júgirip shyǵyp:
– Áke, dalaǵa shyǵyp, oınap keleıikshi, – dep ótinedi. Jumystan sharshap kelgen ákesiniń balasyn oınatyp kelýge erinshektigi ustap, bir jaǵynan kóńilin de qımaı, ne derin bilmeı turǵanda jumys ústelindegi dúnıejúzi kartasyna kózi túsedi. Syrtqa shyqpaýdyń amalyn tapqandaı bop ákesi álgi kartany alyp balasyna:
– Balam, eger myna kartany qaıta qurap, túzep óziniń bastapqy haline keltiretin bolsań, seni dalaǵa shyǵaryp oınatyp kelemin, – deıdi de kartany jyrtyp-jyrtyp, bólshektep tastaıdy. Balasy da «jaraıdy, áke» dep kartany qurastyrýǵa kirisip ketedi. Ákesi balasynyń ótinishinen ońaı qutylyp ketkenine masattanyp, kıimin aýystyryp, endi tósegine jantaıa bergende 5 mınýt óter-ótpesten balasy «áke, kartany qurastyryp boldym» dep júgirip keledi. Ákesi sasyp qalady. Kemi eki-úsh saǵatsyz qurastyrý múmkin emes bolǵan kartany qalaısha 5 mınýtta rettep, túzep qoıdy dep baryp qarasa, quraq-quraq qyp jyrtyp ketken kartanyń parshalary tegis óz oryndaryna jaıǵasyp, bastapqy haline kelip tur eken. Múmkin emes dúnıeni áp-sátte qalpyna keltirip qoıǵan balasynyń alǵyrlyǵyna tańǵalǵan ákesi:
– Balam, meniń de ońaıshylyqpen qolymnan kelmeıtin dúnıeni sen qalaısha tez túzetip qoıdyń? – depti. Balasy da óziniń tapqyrlyǵyna masattanyp:
– Áke, qarańyz, dúnıejúzi kartasynyń artqy betinde bir adamnyń sýreti bar. Sol adamdy túzetseńiz, kórip turǵanyńyzdaı, dúnıejúzi de óziniń burynǵy túzý qalpyna keledi, – deıdi.
Iá, ras!
Búginde adamdar bul dúnıeni túzetpek bop basyn taýǵa da, tasqa da soǵyp júr...
Shirkin, ár adam óz-ózin túzetkende ǵoı, bul dúnıe de, ózdiginen túzeler me edi...
Jazba Erlan Júzeevtiń Facebook paraqshasynan alyndy.
