Birneshe kún buryn Qamshy.kz aqparat agenttigi «Astana Arlandarynyń» bas bapkeri Nurlan Aqúrpekov myrzanyń «Kýba qabylandary bizdiń Arlandar úshin qubyjyq emes» atty suhbatyn jarıalaǵan edi.
Onda, Prezıdent kýbogynda Ábilhan Amanqul bir qolynan jaraqat alǵany, jýyqta daıyndyq ústinde ekinshi qolyn da jaralap alǵany, sondyqtan fınaldyq kezdesýde ornyna Saparbaı Aıdarov shyǵatyny aıtylǵan bolatyn.
Búkil álemdik boks serıasynyń WSB jobasy boıynsha fınaldyq kezdesý 15 shilde kúni Astana qalasyndaǵy «Qazaqstan» sport kesheninde ótetini belgili. Jetinshi maýsymdy túıindeıtin bul dodada «Astana Arlans» pen «Cuba Domadores» komandalary óner kórsetedi.
Kýbalyqtar bul fınalǵa kileń Olımpıada, Álem chempıondaryn, tek qana birinshi nomerli boksshylaryn ákelip otyr. Al «Astana Arlandary» komandasy ekinshi, úshinshi, tórtinshi nomerli boksshylardan quralsa da Ózbekstan, Reseı, Ázirbaıjan, Qytaı, Anglıa sıaqty elderdiń tek qana birinshi nomerli boksshylaryn jeńip, fınalǵa jetip otyr.
Kúlli jankúıer kóz tikken osynaý shaıqasqa Ulttyq quramadan kómekke keledi degen Vasılı Levıt pen Qamshybek Qońqabaevtyń maıdanǵa shyqpaıtyny ótkende belgili bolǵan edi. Al 75 keli salmaqta sharshy alańǵa shyǵady dep kútken Ábilhan Amanqul jaraqatyna baılanysty alańǵa shyǵar-shyqpasy belgisiz qalǵan. Dárigerlerdiń tekserýinen ótken Ábilhannyń aqtyq synda alańǵa shyǵatyny búgin anyq belgili boldy. Osyǵan baılanysty Arlandardyń bas bapkeri Nurlan Aqúrpekov jáne komanda sapynda óner kórsetetin Ábilhan Amanquldyń ózimen de pikirlesken edik.
«75 kelide Ábilhan Amanqul rıngke shyǵa almaıtyn boldy» degen habar jankúıerlerdiń kóńiline sýyq sý sepkendeı bolyp edi...
Ábilhannyń jaraqaty aýyrlaý bolǵany ras. Onyń ústine ol tamyz aıynda Germanıanyń Gambýrg qalasynda ótetin Álem chempıonatyna qatysýy kerek. Ol dodaǵa baılanysty oqý-jattyǵý jumystary 12-shi shildede bastalady. Sonymen Ulttyq quramanyń bas bapkerimen aqyldasyp, ol jattyǵýdan bosattyq. Levıt te Qamshybek te shyqpaıtyn bolǵan soń, 75 kelide jeńis ákeledi dep kútken bir jigitim osy Ábilhan edi. Jankúıerler tarapynan «Bizde myqty jigitter kóp qoı, olardy nege shyǵarmaıdy?» degen sıaqty san túrli saýaldar bolady ǵoı. Sondyqtan qoly aýyrsa da Ábilhanǵa senim artýǵa týra keldi. Dárigerler ruqsat berdi, qazir emniń barlyq túrin qabyldap jatyr.
Qamshybek Qońqabaev Arlandar sapynda alańǵa shyǵyp qalar degen úmit áli de úzilgen joq. Ol jaıly ne aıtar edińiz?
Qamshybek týraly aıtar bolsaq, «anasy aýyryp qaldy» degen sýyt habar jetken kúni alyp-ushyp maǵan keldi. Jaǵdaıdy estigen soń birinshi bolyp men qoldadym. «Anańnyń qasyna bar. Hal ústinde jatqanda qol-aıaǵyn ýqalap, qasynda otyrǵanǵa ne jetsin? Aman-esen qasyna barǵanyń anańa kúsh beredi» dep ushaqqa ózim otyrǵyzyp jiberdim. Sosyn, birneshe kúnnen soń habarlastym. «Aǵa, anam komada jatyr. Sóıleı almaıdy. Biraq, bárin kórip, sezip jatyr. Al men bolsam biraz kún daıyndyqtan qalyp qoıdym, maǵan renjimeseńizder, anamnyń qasynda bolaıyn», dep bul aıqasqa kelmeıtinin bildirdi. Sonymen Oljas Buqaevty daıyndaýǵa kiristik.
Buqaev pen qarsylasy týraly aıta otyrsańyz.
Oljas Buqaev ta osal jigit emes. Meniń joramalym boıynsha onyń aıqasy sondaı bir tartysty da qyzyqty bolaryna senemin. Óıtkeni, kýbalyqtyń da boıy onsha uzyn emes, dene kelbeti de Buqaevqa keledi. Ekeýiniń de boks máneri bir stılde, rıngtiń qaq ortasynda turyp tiresetin naǵyz jekpe-jek bolady. Al biri uzyn, biri qysqa bolǵanda sál yńǵaısyz oıyn bolary belgili. Qamshybek oınaǵanda basqasha bolar edi, qasha júrip shabýylǵa ótedi, der kezinde soqqy jasaıdy, jyldam da batyl.
Jalpy, Qamshybekke esh ókpem joq. Bul dúnıede anadan artyq kim bar deısiz? Bundaı jaǵdaı bir óte názik nárse ǵoı. Sol úshin jankúıerler de ony túsinedi dep oılaımyn.
Kýbalyqtar Qazaq jerine keldi me qazir?
Iá, olar kelip alǵaly eki kún boldy. Osynda kelip jattyǵyp júr, bizben sýretke de tústi...
***
Fınaldyq kezdesýde úmit artqan boksshymyz Ábilhan Amanquldyń ózin de áńgimege tartqan edik. Ol jalpy jaǵdaıdy qysqasha bylaı baıandap berdi:
Alǵashynda meniń bul maıdanǵa shyqpaımyn degen sebebim – osydan bir jyl buryn sol qolymnan jaraqat alǵanmyn. Ony emdetip jaqsy bolǵan da edim. Sosyn ótken 3-shi maýsym kúni Qostanaıda anglıalyqtarǵa qarsy jekpe-jekte taǵy aýyrtyp aldym. Emdettim, sonda da aýyryp júrdi. Odan keıin jaqynda Astanada ótken Prezıdent kýbogynda oń qolymdy jaralap aldym. Arada biraz kún ótti ǵoı, táýir bolyp qalǵan sıaqty edi. Sonymen, aldyńǵy kúni ótken sparıng daıyndyq kezinde eki qolym da qaıtadan syr berdi. Keshe dárigerler tekserip, rentgenge túsirdi de alańǵa shyǵýyma ruqsat berdi. Qazir emniń bar túrin jasap, lazermen, ınemen emdep jatyr. Men de bar kúshimdi salyp daıyndalýdamyn. Qarsylasym Arlen Lopes álem jáne Olımpıada chempıony, barlyq aıqastaryn ınternetten kórip, zerttep jatyrmyn. Ózin de burynan tanımyn, menimen kezdespese de Jánibek Álimhan, Meırim Nursultanov sıaqty aǵalarymmen kezdesip, jeńilgen. Alla qalasa, mende bári oıdaǵydaı, jankúıerlerimniń senimin aqtaımyn. Óz jerimizde ótip jatqan shaıqasta eldiń, jerdiń, qazaqtyń namysy úshin barymdy salamyn!
Qazaq jurty kóz tikken aıtýly dodada el namysyn qorǵaıtyn boksshylardyń tolyq tizimi tómendegideı:
49 keli, Temirtas Júsýpov – Iohanýs Argılagos
52 keli, Oljas Sáttibaev – Iosbanı Veıtıa
56 keli, Ilás Súleımenov – HaverIbanes
60 keli, Zákır Safıýllın – Lazaro Alvares
64 keli, Dilmurat Mıjıtov – Endı Krýz
69 keli, Aslanbek Shymbergenov – Ronel Iglesıas
75 keli, Ábilhan Amanqul – Aren Lopes
81 keli, Arman Rysbek – Hýlıo La Krýs
91 keli, Anton Pınchýk – Erıslandı Savon
91 keliden joǵary, Oljas Buqaev – Ioandrı Toırak
Nursultan Amanjolv rezervte.
Áńgimelesken, sýretterdi túsirgen Ularbek Dáleıuly
